كەمال كلیچدارئۆغلۆ سەرۆكی پارتی گەلی كۆماری (CHP) كە گەورەترین پارتی ئۆپۆزسیۆنی توركیایە، لە كۆبوونەوەیەكیدا لەگەڵ ئەندامانی سەركردایەتیی پارتەكەی، باسی لە هەڵبژاردنی پێشوەختە كردووە گوتوویە: "خۆتان ئامادە بكەن، لە پاییزی ئەمساڵدا هەڵبژاردنی پێشوەختە بەڕێوە دەچێت".

كلیچدارئۆغلۆ داوای لە ئەندامانی سەركردایەتیی كردووە، بەردەوام بن لە بەسەركردنەوەی ناوچەی ئەنادۆڵ و دەبێت قسە بۆ خەڵك بكەن و پێیان بڵێن توركیا گەیشتووەتە چ قۆناغێکی خراپ.

ئاژانسی (سپوتنیك)ی رووسی قسەكانی كلیچدارئۆغلۆی بڵاو كردووەتەوە و دەڵێت: "لە خەبات بەردەوام دەبین، هەروەها پێویستە بەردەوام بین لە بەسەركردنەوەی خەڵك لە ناوچەی ئەنادۆڵ و ئامادەكاری تەواو بكەن بۆ هەڵبژاردن، چونكە بارودۆخی ئابووریی توركیا ئەوەندە خراپە، لە پاییزی ئەمساڵدا هەڵبژاردنی پێشوەختە بەڕێوە دەچێت".

سەرۆکی ئۆپۆزسیۆن باسی لەوەش كردووە: "دەبێ بە ٨١ شاری توركیادا بگەڕێن و بۆ خەڵكی روون بكەنەوە كە كشانەوە لە (رێككەوتنی ئیستانبۆڵ) كە پارێزگاری لە مافی ئافرەت دەكرد، چەند كارەسات و عەیبەیە بۆ توركیا، چونكە خەڵكێكی زۆر نازانن ناوەڕۆكی رێككەوتنەكە چۆنە".






باسنيوز