دوای تێپه‌ڕبوونی 17 ساڵ به‌سه‌ر ئه‌و بومه‌له‌رزه‌یه‌ی له‌ ساڵی 2004 له‌ زه‌ریای هیندی روویداو و بووه‌ هۆی روودانی شه‌پۆلی تسۆنامی له‌ وڵاتی ئیندونیزیا، كه‌ به‌هۆیه‌وه‌ 230 هه‌زار كه‌س گیانیان له‌ده‌ستدا و به‌ یه‌كێك له‌ گه‌وره‌ترین كاره‌ساته‌ سروشتییه‌كان هه‌ژمار ده‌كرێت، یه‌كیك له‌ پۆلیسه‌كانی ئه‌و وڵاته‌ كه‌ شه‌پۆله‌كه‌ راپێچی كردبوو، له‌ یه‌كێك له‌ نه‌خۆشخانه‌ ده‌روونییه‌كان دۆزرایه‌وه‌.

رۆژنامه‌ی "زه‌ سه‌ن" له‌سه‌ر زاری خانه‌واده‌ی "ئه‌بریب ئه‌سیب"، پۆلیسه‌ دۆزراوه‌كه‌ گواستییه‌وه‌، كاتێك تسۆنامی و بومه‌له‌رزه‌كه‌ هه‌رێمی ئاچیهی رۆژئاوای ئیندۆنیزیای گرته‌وه‌، ئه‌و له‌ سه‌رسه‌ر كاره‌كه‌ی بوو.


یه‌كێك له‌ كه‌سه‌ نزیكه‌كانی ئه‌و پۆلیسه‌ گوتی: دوای بڵاوبوونه‌وه‌ی ژماره‌یه‌ك وێنه‌ی "ئه‌بریب ئه‌سیب" له‌ تۆڕه‌ كۆمه‌ڵایه‌تییه‌كان، به‌م دواییانه‌ ئه‌وان زانییان كه‌ ئه‌سب زیندووه‌.

گوتیشی: "ناتوانم باوه‌ڕ به‌مه‌ بكه‌م، 17 ساڵ بێ هه‌واڵی، ئێمه‌ له‌و باوه‌ڕه‌دا بووین ئه‌و مردووه‌، نه‌مانده‌زانی هێشتا له‌ ژیان ماوه‌".


لای خۆیه‌وه‌ پۆلیسی خۆجێیی ئه‌و هه‌رێمه‌ی ئیندۆنیزیا دووپاتیكرده‌وه‌، هه‌ر به‌ڕاستی ئه‌و پیاوه‌ی له‌ نه‌خۆشخانه‌ی ده‌روونی دۆزراوه‌ته‌وه‌، "ئه‌بریب ئه‌سیب"ـه‌، كه‌ له‌كاتی روودانی تسۆنامیدا وه‌ك بێسه‌روشوێن ناوی تۆماركرابوو و دواتر به‌ مردوو له‌قه‌ڵه‌م درابوو.

وێڕای نه‌هامه‌تییه‌كانی كه‌ به‌هۆی كاره‌ساته‌كه‌ تووشی هه‌ڵچوونی ده‌روونی ببوو، دووباره‌ ئه‌سیب گه‌ڕێندرایه‌وه‌ باوه‌شی خێزانه‌كه‌ی و به‌گوێره‌ی میدیاكانی ئه‌و وڵاته‌، ته‌ندروستییه‌كه‌ی باشه‌.
k24 -