رەجەب تەیب ئەردۆغان سەركۆماری توركیا، وەكوو وەڵامدانەوەیەك بۆ ئۆپۆزسیۆنی توركیا كە داوای هەڵبژاردنی پێشوەختەیان كردبوو، دەڵێت هەڵبژاردنی پێشوەختە لە رۆژەڤی ئێمەدا نییە و كەس بیری لێ نەكاتەوە.

ئەردۆغان لە كۆبوونەوەیەكیدا لەگەڵ ئەندامانی ئەنجوومەنی سەركردایەتیی ئاكەپە، كە رۆژنامەی (حوریەت) ناوەڕۆكی كۆبوونەوەكەی بڵاو كردووەتەوە، تیشكی خستووەتە سەر هەڵبژاردنی پێشوەختە و توندوتیژی بەرامبەر ئافرەت و بابەتی گەشتیاری.

لەبارەی هەڵبژاردنی پێشوەختەوە گوتوویەتی: "هەڵبژاردن لە ٢٠٢٣ دەكرێت و كەس بیر لە هەڵبژاردنی پێشوەختە نەكاتەوە. ئۆپۆزسیۆن بۆ مەرامی سیاسیی خۆی بایەتێكی لەو شێوەیە دەهێنێتە بەرباس، بەڵام لیژنەیەكمان پێك هێناوە بۆ ئەوەی بتوانین یاسای هەڵبژاردن و پارتە سیاسییەكان لە توركیا بگۆڕین".

لەبارەی زیندووكردنەوەی كەرتی گەشتیاریش، ئەردۆغان ئاماژەی داوە قسەی لەگەڵ ئەنجێلا مێركل سەرۆك وەزیرانی ئەڵمانیا كردووە و، بەنیازن كەرتی گەشتیاری زیندوو بكەنەوە.




باسنيوز