سەرۆک وەزیرانی نیوزلاند رایگەیاند، لەگەڵ بەرپرسانی ئوسترالیا گفتوگۆیان کردوە بۆ دەستپێکردنەوەی گەشتەکانی نێوان هەردو وڵات، ئەوەش لەکاتێکدایە بۆ ماوەی دو رۆژە هیچ توشبویەکی نوێی کۆرۆنا لە وڵاتەکەی تۆمارنەکراوە.

بەشداری لە کۆبونەوەی ئەنجومەنی وەزیرانی ئوسترالیا دەکات، بۆ گفتوگۆکردن لەبارەی کردنەوەی سنورەکان و دەستپێکردنەوەی گەشتەکانی نێوان هەردو وڵات


جاسیندا ئەردێرن، سەرۆک وەزیرانی نیوزلاند ئەمڕۆ سێشەممە بەشداری لە کۆبونەوەی ئەنجومەنی وەزیرانی ئوسترالیا دەکات، بۆ گفتوگۆکردن لەبارەی کردنەوەی سنورەکان و دەستپێکردنەوەی گەشتەکانی نێوان هەردو وڵات.

بەرپرسانی نیوزلاندا و ئوسترالیا دەڵێن، پڕۆسەی کردنەوەی سنورەکان هەندێک کاتی دەوێت و دەبێت زۆر بە هۆشیارانە رێکارەکانی بەرەنگاربونەوەی ڤایرۆسی کۆرۆنا لە وڵاتەکانیان کەمبکرێتەوە.

گەشتە دەریاییەکانی نێوان وڵاتەکەی و نیوزلاندی دراوسێی دەبێت بە یەکەمین رێگەی نێودەوڵەتی، کە لەنێوانیاندا بکرێتەوە


هاوکات سکۆت مۆریسۆن، سەرۆک وەزیرانی ئوسترالیا رایگەیاند، گەشتە دەریاییەکانی نێوان وڵاتەکەی و نیوزلاندی دراوسێی دەبێت بە یەکەمین رێگەی نێودەوڵەتی، کە لەنێوانیاندا بکرێتەوە، لەو کاتەشدا گەشتە ئاسمانییە ناوخۆییەکانی وڵاتەکانیان دەستپێدەکاتەوە.

ماوەی زیاتر لە مانگێکە هەریەکە لە ئوسترالیا و نیوزلاند سنورەکانیان بەڕوی گەشتیارانی یەکتری و جیهانیشدا داخستوە، تەنها رێگە بە گەڕانەوەی هاوڵاتیەکانی خۆیان دراوە کە بگەڕێنەوە وڵاتەکەی خۆیان.

تا ئێستا لە ئوسترالیا شەش هەزار و 800 توشبوی ڤایرۆسی کۆرۆنا و 96 حاڵەتی مردن تۆمارکراون، لە نیوزلاندیش ژمارەی توشبوەانی ڤایرۆسەکە گەیشتوەتە هەزار و 437 توشبو و 20 حاڵەتی مردن تۆمارکراون.



خەندان