تووشبوون بە کۆرۆنا لە جیهاندا بۆ زیاتر لە یەک ملیۆن تووشبوو بەرزبووەوە، هاوکات زیاتر لە 51 هەزار کەسیش گیانیان لەدەستداوە و نزیکەی 209 هەزار کەسیش چاکبوونەتەوە.

بەپێی ئامارە فەرمییەکان لەبارەی تووشبوون و گیانلەدەستدان بە ڤایرۆسی کۆرۆنا، تاوەکو ئێستا ملیۆنێک و 168 کەس تووشی کۆرۆنا بوون، لەو ژمارەیەش 51 هەزار و 354 کەس گیانیان لەدەستداوە و 210 هەزار و 191 کەسیش چاکبوونەتەوە.

بەگوێرەی ئەو زانیارییانەی بەردەستن، زیاتر لە 5%ی تووشبووانی کۆرۆنا گیانیان لەدەستداوە و زیاتر لە 20%یشیان چاکبوونەتەوە، دۆخی تەندروستیی نزیکەی 4%یشیان هەستیارە.

زۆرترین ژمارەی تووشبوون بە کۆرۆنا لە ئەمریکایە، بەشێوەیەک ئەمڕۆ زیاتر لە 20 هەزار تووشبوو تۆمارکراون و تاوەکو ئێستاش زیاتر لە 233 هەزار کەس تووشی کۆرۆنا بوون و پێنج هەزار و 738 کەسیان گیانیان لەدەستداوە. ئیتاڵیا لەڕووی زۆری ژمارەی تووشبووانی کۆرۆنا لە پلەی دووەم دێت لەسەر ئاستی جیهان و لەڕووی گیانلەدەستدان بە کۆرۆنا لە پلەی یەکەمدایە، بەشێوەیەک زیاتر لە 115 هەزار کەس تووشبوون و نزیکەی 14 هەزار کەس گیانیان لەدەستداوە.

ئیسپانیاش لەڕووی زۆریی ژمارەی تووشبوون بە کۆرۆنا لە پلەی سێیەم دێت و زیاتر لە 110 هەزار کەس تووشبوون، لەڕووی زۆریی ژمارەی گیانلەدەستدانیش لە پلەی دووەم دێت لەسەر ئاستی جیهان و 10 هەزار و 96 کەس تاوەکو ئێستا گیانیان لەدەستداوە.











رووداو