بەپێی زانیاریی میدیا فەرمیەکانی ئێران، بەهۆی مردنی دوو کەس بەهۆی تووشبوون بە ڤایرۆسی کۆرۆنا، لە شاری "قوم"، ئەمڕۆ پێنجشەممە سەرجەم خوێندنگەکان لەو پارێزگایە کراوەتە پشوو.

ماڵپەڕی (ئیرنا) لەمبارەوە بڵاوی کردووەتەوە، بەو هۆیەوە سەرجەم قوتابخانە، کۆلیژ و زانکۆکانی پاریزگای قوم، بە مەبەستی پێشگیری لە ڤایرۆسی کۆرۆنا و تاوتوێی زیاتری ئەو بابەتە، کراونەتە پشوو.

هەر لەم پەیوەندییەدا و پاش گیانلەدەستدانی دوو کەس بەهۆی ئەگەری تووشبوون بە ڤایرۆسی کۆرۆنا و درێژەدان بە پشکنینەکان بۆ یەکلاکردنەوەی، محەمەدڕەزا قەدیر سەرۆکی زانکۆی پزیشکیی قوم بە (ئیرنا)ی ڕاگەیاندووە کە تەشەنەکردنی ئەو ڤایرۆسە لە قوم کۆنترۆڵ کراوە و داوا لە خەڵک دەکەین، هاوکات لەگەڵ لەبەرچاوگرتنی ڕێنوێنییە تەندروستیەکان، نیگەرانی تەشەنەکردنی نەبن.

هاوکات بە بڕیارێک دوو نەخۆشخانەی "کامکار و فەرقانی" بۆ کەرەنتینە و ئەگەری تووشبوونی خەڵک تەرخان کراون و ئەو کەسانەی جێگەی گومان بن، ڕەوانەی ئەو نەخۆشخانە دەکرێن.

هاوکات دەمامکی پێویست بۆ پاریزگای قوم ڕەوانە کراوە و ڕێنامیی پێویست بە هاووڵاتیان دراوە.









باسنيوز