وەزیری دەرەوەی کۆماری ئیسلامیی ئێران ناڕاستەوخۆ داوای دانوستاندن لە ئەمریکا دەکات.

بەپێی هەواڵی میدیا ئێرانییەکان، محەمەدجەواد زەریف، وەزیری دەرەوەی ئێران رایگەیاندووە، دیپلۆماسییەت هۆکارێکە بۆ کەمکردنەوەی تێچوو و هەوڵەکانی یەکلاکردنەوەی ناکۆکییەکان.

محەمەدجەواد زەریف ناڕاستەوخۆ داوای دانوستاندنی لە ئەمریکا کردووە و رایگەیاندووە، ”دانوستاندن کارێکی خراپ نییە، پاش هەموو شەڕێک دانوستاندن هەیە“.

ئەو لێدوانەی زەریف گۆڕانکارییەکی نوێیە لە هەڵوێستی ئێران، چونکە پێشتر بەرپرسانی ئێران بەردەوام دانوستاندنیان لەگەڵ ئەمریکا رەت دەکردەوە.

پەیوەندییەکانی ئێران و ئەمریکا دوای کشانەوەی ئەمریکا لە رێککەوتننامەی ناوکی و کوشتنی قاسم سولەیمانی، بەرەو ئاڵۆزترین و خراپترین بارودۆخ چوون.

بەرەبەیانی رۆژی هەینی 3-1-2020، سوپای ئەمریکا لەڕێی فڕۆکەی بێفڕۆکەوانەوە، کاروانێکی چەکداریی حەشدی شەعبی لە فڕۆکەخانەی بەغدا بۆردومان کرد.

بەهۆی بۆردومانەکەوە، هەریەکە لە ئەبومەهدی موهەندیس، جێگری سەرۆکی دەستەی میلیشیاکانی حەشدی شەعبی و قاسم سولەیمانی، فەرماندەی سوپای قودسی سەر بە سوپای پاسدارانی ئێران و نۆ بەرپرس و چەکداری دیکەی حەشدی شەعبی، کوژران.

قاسم سولەیمانی، کە لە 11-3-1957 لە گوندی قەنات مەلەک لە شاری کرمان لە باشووری رۆژهەڵاتی ئێران لە دایک بووە، یەکێک بوو لە فەرماندە و بڕیاربەدەستە باڵاکانی ئێران.

شەوی 8/5/2018، دۆناڵد ترەمپی سەرۆکی ئەمریکا بڕیاری کشانەوەی وڵاتەکەی لە رێککەوتنی ناوکیی ئێران و وڵاتانی پێنج + یەک، واژۆ کرد.

رێککەوتنی ناوکیی ئێران و وڵاتانی پێنج + یەک لە سەرەتای نیسانی 2015 لە شاری لۆزان لە سویسڕا واژۆ کرا، کە بەپێی ئەو رێککەوتنە ئێران دەستبەرداری دروستکردنی چەکی ناوکی دەبێت و ئەمریکاش سزاکانی لەسەر ئەو وڵاتە سووک دەکات.

وڵاتانی پێنج + یەک بریتین لە پێنج وڵاتی ئەندامی هەمیشەیی ئەنجومەنی ئاسایشی نێودەوڵەتی (ئەمریکا، فەرەنسا، رووسیا، بەریتانیا و چین) و ئەڵمانیا پێک دێت.








باسنيوز