سیلڤیۆ بەرلسكۆنی سەرۆكوەزیرانی پێشووی ئیتاڵیا، لە تازەترین دیمانەیدا ئاشكرای دەكات، دوای ئەوەی توركیا لە ئەندامێتیی یەكێتی ئەورووپا وەرنەگیرا، رەجەب تەیب ئەردۆغان بیرۆكەی دروستكردنەوەی ئیمپڕاتۆریەتی عوسمانیی بە مێشكدا هات.

ئەو دەڵێت لە ٢٠٠٣ توانیویەتی بڕوا بە ئەردۆغان بهێنێت و بێتەوە ناو دانوستاندنی ئەندامبوونی توركیا لە یەكێتی ئەورووپا، بەڵام سەرۆكەكانی یەكێتی ئەورووپا رەتیان كردەوە.

بەرلسكۆنی لە كاتی بەشداریكردنی لە چالاكییەكی سیاسی لە پاراگوای، لە پرێس کۆنفرانسێکی رۆژنامەوانیدا هەڵسەنگاندنی بۆ هێرشی توركیا بۆ سەر رۆژئاوا كرد.

ئەو گوتیشی: "راپرسییەك كراوە، ٦٣٪ هاووڵاتییانی توركیا داوا دەكەن توركیا ببێتە ئەندامی یەكێتیی ئەورووپا، بەڵام ئەمە رووی نەدا و ئەردۆغان پشتی لە یەكێتیی ئەورووپا كرد، بە جۆرێك لە جۆرەكان خەریكی زیندووكردنەوەی ئیمپڕاتۆریەتی عوسمانییە“.

بەرلسكۆنی ئاماژەی بەوەش دا: "كاتێك ئەو سەرۆك وەزیرانی ئیتاڵیا بووە، پشتگیریی توركیای كردووە بۆ ئەوەی ببێتە ئەندامی یەكێتیی ئەورووپا، بەڵام یەكێتیی ئەورووپا نەیانهێشت دانوستاندن لەو ڕووەوە دەست پێ بكات، بۆیە ئەمە بە هەڵەیەكی گەورە ناو دەبات.

گوتیشی: "ئەندامێكی گرنگی ناتۆ، وڵاتێك لە نێوان ئاسیا و ئەورووپا و لە نێوان رۆژهەڵات و رۆژئاوایە، لەبری ئەوەی لە ئەورووپای نزیك بكەینەوە، كەچی توركیا بەرەو وڵاتانی ئیسلامی دەچێت، ئەمەش شتێكی باش نییە. ئەگەر ئەوكات بە قسەی منیان بكردایە و كارەكان وەكوو ئەوەی داوام كردبوو جێبەجێ بكرابایە، ئێستا ئەو بارودۆخەی لە توركیا و رۆژئاوا هەیە رووی نەدەدا".



پەیوندیی نێوان ئەردۆغان و بەرلسكۆنی

لە ساڵی ٢٠١١دا بەرلسكۆنی لە پۆستی سەرۆكوەزیرانی ئیتاڵیا كشایەوە، كە ٤ جار لەسەر یەك ئەو پۆستەی هەبووە. لەو كاتانەی سەرۆكوەزیران بووە هەمیشە لەگەڵ ئەردۆغاندا بە دۆست ناوی یەكیتریان هێناوە.

لە ٢٠٠٣ كاتێك بیلالی كوڕی ئەردۆغان هاوسەرگیری كرد، بەرلسكۆنی وەكوو شایەد ئامادەی رێوڕەسمی زەماوەندی مارەبڕینەكە بوو. لە رێوڕەسمی سوێندخواردنی ئەردۆغان وەكوو سەرۆك كۆماری توركیاش، بەرلسكۆنی بە فەرمی لە لایەن ئەردۆغانەوە داوەتی ئەو رێوڕەسمە كرا لە ٢٠١٨.

لە ٢٠١٨ ئەردۆغان سەردانی ئیتاڵیای كرد و لەوێ بۆ رۆژنامەی (لا ستامپا)ی ئیتاڵی گوتی: "دەبێ پەیوەندیی نێوان توركیا و ئیتاڵیا بەرەو باشتر بڕوات، لە سەردەمی بەرلسكۆنی كە دۆستێكی نزیكم بوو كاری زۆر باشمان بە یەكەوە كرد و پەیوەندیمان زۆر باش و ئەرێنی بوو، بۆیە دەبێت پەیوەندییەكان وەكوو ئەو سەردەمە لێ بكەینەوە".




باسنيوز