دوو سیناتۆری ناسراوی ئەمریکا پرۆژە بڕیارێک دەدەنە کۆنگرێسی وڵاتەکەیان کە تایبەتە بە سەپاندنی سزا بەسەر تورکیا ئەگەر بێتو ئەنقەرە ئۆپەراسیۆنی سەربازی بۆ سەر ناوچەکانی ژێر دەسەڵاتی هەسەدە ئەنجام بدات.

لیندزی گراهام و ڤان هۆڵین، ئەندامانی کۆنگرێسن لەسەر پشکی هەردوو پارتی کۆمارییەکان و دیموکراتەکان، پرۆژەبڕیارەکەیان لەبارەی سەپاندنی سزا بەسەر تورکیا و دەرکردنی ئەو وڵاتەیە لە هاوپەیمانێتی ناتۆ.

لیندزی گراهام لەبارەی پرۆژە بڕیارەکە دەڵێت، "هەموو کارێک دەکەم لە توانامدا بێت بۆ سەپاندنی سزا بەسەر سوپای تورکیا و ئابوورییەکەیدا، ئەگەر یەک پێ بنێنە ناو سووریاوە".

پرۆژەکەبڕیارەکە دوای پەیوەندییە تەلەفۆنییەکەی نێوان سەرۆکی ئەمریکا و سەرۆککۆماری تورکیا، دواتریش راگەیێندراوەکەی کۆشکی سپی لەبارەی ئەگەری ئەنجامدانی ئۆپەراسیۆنی سوپای تورکیا بۆسەر ناوچەکانی ژێر دەسەڵاتی هەسەدە و نەمانی سوپای ئەمریکا لەو ناوچەیە دێت.

کاژێر 06:38 خوولەکی ئەمڕۆ، ئێوارەی ئەمڕۆ دۆناڵد ترەمپ لەتوویتێکدا هۆشداری دایە تورکیا کە هەنگاوەکانی لەسنوور دەرنەچن، ئەگەر هەرشتێک بکەن لە سنوور دەربچێت، ئەوا ئابوورییەکەیان وێران دەکات.