سەرۆک وەزیرانی یۆنان رایدەگەیەنێت، کە تورکیا پەنابەرانی نایاسایی بۆ بەرژەوەندیی خۆی، بەکار دەهێنێت.

کیریاکۆس میتسۆتاکیس، سەرۆک وەزیرانی یۆنان لە وتارێکدا لە پەرلەمانی وڵاتەکەی، رایگەیاندووە، پێویستە تورکیا بەرپرسیارێتی خۆی هەڵبگرێت و پەڕینەوەی پەنابەرانی نایاسایی لە وڵاتەکەیەوە بۆ یۆنان، کۆنترۆل بکات.

کیریاکۆس میتسۆتاکیس پێی وایە تورکیا پەنابەرانی نایاسایی بۆ بەرژەوەندیی سیاسیی خۆی بەکار دەهێنێت، بەوەی لە رێککەوتنی لەگەڵ یەکێتیی ئەوروپا پەشیمان بووەتەوە و رێگری لە پەڕینەوەی پەنابەران ناکات.

لەبارەی یاسای پەنابەری لە یۆنانەوە، سەرۆک وەزیرانی ئەو وڵاتە رایگەیاندووە، پێشنیازی توندترکردنی یاساکانی پێدانی مافی پەنابەری، دەکات.

لە مانگی ئاداری 2016، تورکیا و یەکێتیی ئەوروپا رێککەوتنێکیان لەبارەی پەنابەرانەوە واژۆ کرد، کە بەهۆیەوە یەکێتییەکە هاوکاریی دارایی تورکیای دەکرد لەبەرامبەر رێگریکردنی تورکیا لە پەنابەرانی نایاسایی لە پەڕینەوە بۆ یۆنان و وڵاتانی دیکەی یەکێتیی ئەوروپا.














ياسنيوز