یان یامبۆن دەبێتە سەرۆکوەزیرانی هەرێمی فلاندەرزی بەلجیکا
یان یامبۆن کە لە پارتی "هاوپەیمانیی فلاندەرزی نوێ"ـە و دەبێتە سەرۆکوەزیرانی هەرێمەکەی بەلجیکا، لە گوتەیەکدا ئاماژەی بەوەکرد، "پاکێجێکی زۆر باشیان بۆ بەهێزکردنی پێگەی هەرێمی فلاندەرز" هەیە.
یان یامبۆن کەسایەتییەکی ناسراوی سیاسی بەلجیکایە و لە ماوەی چەند ساڵی رابردوودا پۆستی گرنگی هەبووە. یامبۆن ساڵی 2007 ئەندامی پەرلەمانی بەلجیکا بووە، ساڵی 2013 بووەتە سەرۆک شارەوانی براسخات و ساڵی 2014ـەش بووەتە جێگری سەرۆکوەزیران، وەزیری ناوخۆ و ئاسایشی حکومەتی فیدراڵیی بەلجیکا.
دلاوەر ئاژگەیی، نوێنەری حکومەتی هەرێمی کوردستان لە یەکێتیی ئەوروپا بە تۆڕی میدیایی رووداوی راگەیاند، یامبۆن پێشتریش بە سەرۆکایەتیی شاندێک سەردانی هەرێمی کوردستانی کردووە و بە هەرێمی کوردستان ئاشنایە.
ئاژگەیی رایگەیاند، هەرچەندە هەر ئێستاش پەیوەندییەکی بەهێز لەنێوان هەرێمی کوردستان و هەرێمی فلاندەرزدا هەیە، بەڵام چاوەڕێدەکرێت دەستبەکاربوونی یامبۆن وەک سەرۆکوەزیران ببێتەهۆی باشتربوونی ئەو پەیوەندییانە و بەهێزتربوونی پەیوەندییەکانی نێوان حکومەتی هەرێمی کوردستان و حکومەتی فیدراڵیی بەلجیکاش.
