ئەنجامی بەرایی هەڵبژاردنی پەرلەمانی نەمسا راگەیێندرا و پارتەکەی کورز، راوێژکاری پێشووی نەمسا لە پێش پارتەکانی دیکەوەیە.

ئەمڕۆ یەکشەممە 29-9-2019 لە نەمسا هەڵبژاردنی پەرلەمانی بەڕێووەچوو، کاژێر 7ی بەیانی بەکاتی ڤیەننا بنکەکانی دەنگدان بە رووی دەنگدەران کرانەوە و کاژێر پێنج بنکەکانی دەنگدان داخران.

بەپێی ئەنجامە بەراییەکانی هەڵبژاردنەکە، پارتی پارێزگارانی نەمسا کە لەلایەن سیباستان کورز، راوێژکاری پێشووی نەمسا سەرۆکایەتیدەکرێت، لە 37%ـی دەنگەکانی بردووەتەوە و لە پلەی یەکەم دێت.

هاوکات بەپێی ئەنجامەکان، پارتی ئازادی، کە هاوپەیمانی پێشووی پارتەکەی کورز بووە 16%ـی دەنگەکانی بردووەتەوە و لە پلەی دووەم دێت.

حکومەتەکەی کورز بەهۆی هەڵوەشانەوەی هاوپەیمانییەتیی پارتەکەی لەگەڵ پارتی ئازادی هەڵوەشایەوە و دوای ئەوەش پەرلەمانی نەمسا سەرۆکی دادگای دەستووری وەک راوێژکاری وڵات دەستنیشانکرد و بڕیاردرا هەڵبژاردنی پێشوەختە لە نەمسا ئەنجامبدرێت.

بەپێی ئەنجامی دەنگدانەکەی ئەمڕۆش بێت، هیچ یەکێک لە پارتە براوەکانی هەڵبژاردنەکە ناتوانن بەتەنیا حکومەت پێکبهێنن و پارتەکان ناچارن پەنا بۆ پێکهێنانی هاوپەیمانی ببەن بۆ پێکهێنانی حکومەتی نوێ و هەڵبژاردنی راوێژکارێکی نوێ بۆ وڵاتەکەیان.