بەغدادی خەریكی بنیاتنانەوەی بەشەكانی فەرماندەیی و چاودێریی داعشە
بە گوێرەی توێژینەوەیەكی پەیمانگەی توێژینەوەی جەنگ كە لە حوزەیرانی ئەمساڵ ئامادە كراوە، داعش ئێستاش بەهێزترە لە رێكخراوی قاعیدەی عێراق لە 2011، واتە ئەو ساڵەی كە ئەمریكا هێزەكانی لە عێراق كشاندەوە. ئەوكاتە رێكخراوی قاعیدەی عێراق نزیكەی 700 تاوەكو 1000 چەكداری هەبوو، بەڵام بەگوێرەی مەزندەكانی ئاژانسی هەواڵگریی بەرگری، داعش لە مانگی ئابی 2018 نزیكەی 30 هەزار چەكداری لە سووریا و عێراق هەبوون.
داعش لە پاشماوەی بچووكی ئەلقاعیدە لە 2011 سوپایەكی هێندە گەورەی دروستكرد كە بەس بوو بۆ ئەوەی فەللوجە، مووسڵ و شارەكانی دیكەی عێراق بگرێت و تەنیا لە سێ ساڵدا بەسەر بەشێكی زۆری رۆژهەڵاتی سووریادا باڵادەست بێ. ئەو رێكخراوە زۆر خێراتر (لە قاعیدە) هەڵدەستێتەوە و دەگاتە ئاستێكی مەترسیدارتر لەو هێزە زۆرەی ئێستا هەیەتی.
بچووكبوونەوەی ناوچەكانی ژێر دەسەڵاتی داعش و كەمبوونەوەی هێزی ئەو رێكخراوە كە لە سەردەمی سەرۆك ئۆباما دەستیپێكرد و لەسەردەمی سەرۆك ترەمپ بەردەوام بوو، زۆر بە هێواشی بەڕێوەچوو، ئەوەش كاتێكی زۆری بەو گرووپە دا بۆ قۆناخی داهاتوو پلان دابنێ و خۆی ئامادە بكات.
داعش پێش رووخانی خەلافەت پلانێكی ئامادەی هەبوو بۆ هەڵسانەوە. لە ماوەی هەڵمەتی بەرەنگاربوونەوەی داعش لەلایەن هێزە ئەمنییەكانی عێراق، هێزەكانی سووریای دیموكرات و هاوپەیمانێتیی نێودەوڵەتیی دژی داعش بە سەركردایەتی ئەمریكا، خەریكی جێبەجێكردنی ئەو پلانە بوو. داعش بە ئەنقەست پاشەكشێی دەكرد و ژمارەیەكی زۆر لە چەكدار و خێزانەكانی لە مووسڵ و رەققە و شارە گرنگەكانی دیكە بۆ زۆنە كۆن و نوێیەكانی پشتیوانی خۆی لە عێراق و سووریا گواستەوە. ئێستا هێزەكانی سەر بە داعش لە هەردوو وڵات بڵاوەیان پێكراوە و گورزی بەهێز دەوەشێنن.
داعش هێشتاش خاوەنی تۆڕی دارایی جیهانیی خۆیەتی كە خەرجییەكانی قۆناخی گەڕانەوەی ئەو رێكخراوە بۆ رێكخراوێكی گورزوەشێن دەدات، وەك چۆن ئەو رێكخراوە توانیویەتی چەك و پێداویستی لە تونێلەكان و زۆنەكانی خۆیدا هەڵگرێ، تاوەكو پێداویستییەكانی هێزی گورزوەشێنی خۆی پێ دابین بكات، كە خەریكە سەرلەنوێ دەژیێتەوە.
داعش لە كۆتاییەكانی 2018 دەستی بە بنیاتنانەوەی تواناكانی خۆی كردەوە، ئەوەش هێزی ئەوەی پێدەدات لە مانگەكانی داهاتوودا گورزی سەختتر بوەشێنێ. ئێستاش خەریكی بنیاتنانەوەی بەشەكانی فەرماندەیی و چاودێریی رێكخراوەكەیە. لەلایەكی دیكەوە، خەریكی بنیاتنانەوەی تواناكانی خۆیەتی بۆ تەقاندنەوەی ژمارەیەكی زۆر لە ئوتۆمبێلی بۆمبڕێژكراو لە سەرتاسەری عێراق و سووریا. ئەو جۆرە هێرشە تایبەتمەندییەكی سەرەكیی هێرشەكانی سەرەتای ئەو رێكخراوە بوو كە سەرئەنجام كەوتنی فەللوجە و مووسڵی لێكەوتەوە.
داعش هەر ئێستا ژمارەیەك ئوتۆمبێلی بۆمبڕێژكراوی لە شارە رزگاركراوەكانی وەك مووسڵ و رەققە تەقاندووەتەوە. لە مانگی تەممووزی 2018، دەستی بەو جۆرە كارە میدیاییە كردەوە كە بەشێوازی كاری میدیایی داعش ناسراوە، ئەوەش ئاماژەیەكە بۆ ئەوەی ئەو گرووپە توانا میدیاییەكانی دروستكردووەتەوە.
گورزوەشاندنی داعش بەهێزتر دەبێ، لەبەرئەوەی ئەو ناوچانەی لە عێراق و سووریا لەدەستیداون تا ئێستاش سەقامگیر و پارێزراو نین. لە عێراق، داعش بەشێوەیەكی سیستەماتیك سەركردە و دانیشتووانی ئەو گوندانەی كوشتووە كە لەگەڵ هێزەكانی دژی خۆی هاوكارییان كردووە. ئامانجی ئەو گرووپە ئەوەیە خۆڕاگریی خەڵكی ناوچەكان لەهەمبەر خۆی كەم بكاتەوە و تۆوی بێ متمانەیی بەرامبەر حكومەت لەنێو خەڵكدا بچێنێ.
داعش لەو ناوچانەی پشتیوانی لێدەكرێت، دەستی بە سەپاندنەوەی باج بەسەر خەڵكی ناوچەكاندا كردووە، خەڵكی ناوچەكان رادەگوازێ و كۆنترۆڵێكی دیفاكتۆیی بەسەر كۆمەڵێك ناوچەی بچووك بچووكدا هەیە لە عێراق. لە سووریا، داعش لە سێ بەرەوە هەڵمەتێكی گوزروەشاندنی دەستپێكردووە لە دژی هێزەكانی سووریای دیموكرات (هەسەدە)، هێزەكانی رژێمی بەشار ئەسەد و رێكخراوی ئەلقاعیدە لە سووریا كە بە هەیئەی تەحریری شام ناسراوە. هەڵمەتەكەی داعش پێكهاتەكانی حوكمڕانی لاواز دەكات، هەوڵەكانی ئاوەدانكردنەوە دەوەستێنێ و دەبێتە هۆی بەردەوامبوونی شكستی حكومەت و درێژەكێشانی توندوتیژی لە شەڕی نێوخۆی سووریادا.
داعش هەوڵدەدات جارێكی دیكە لە عێراق و سووریا ناوچەی جوگرافی كۆنترۆڵ بكاتەوە، ئەگەر ئەمریكاش بكشێتەوە، ئەوە ئەگەری سەركەوتنی ئەو رێكخراوە هەیە. پشتیوانیی مەیدانیی ئەمریكا لە سووریا وایكردووە هێزە جۆراوجۆرەكانی ناو هەسەدە یەكڕیز بن، بێگومان ئەگەر ئەمریكا بكشێتەوە هەسەدە پارچە پارچە دەبێ. ئامادەیی ئەمریكا لە رۆژهەڵاتی سووریا توانای ئەنجامدانی ئۆپەراسیۆنی هەواڵگری و ئاسمانی هێناوەتە ئاراوە، ئەگەر ئەمریكا لە سووریا بكشێتەوە، هیچ هێزێك ناتوانێ جێگەی پڕبكاتەوە.
بوونی هێزەكانی ئەمریكا لەو ناوچەیە رێگرە لە هێرشی توركیا بۆ سەر باكووری رۆژهەڵاتی سووریا، لەكاتێكدا ئەو هێرشە لە بچووكترین حاڵەتدا هەسەدە ناچار دەكات هێزەكانی لە دۆڵی نێوەڕاستی رووباری فورات بكشێنێتەوە، تاوەكو لەبەرامبەر هێرشەكانی توركیا لە باكوور بەرگری بكات، ئەوەش بۆشاییەكی زیاتر بۆ سەرهەڵدانەوەی داعش لەو ناوچەیە دروستدەكات. هەسەدەیەكی بەهێز و بەتوانا لە رۆژهەڵاتی سووریا پێویستە بۆ ئەوەی رێگربێ لەوەی داعش سووریا وەك بنكەیەك بۆ خۆشكردنی ئاگری هێرشەكانی لە عێراق بەكاربێنێ.
ئەگەر داعش ئەمجارە سەرهەڵبداتەوە، ئاكامەكەی كارەساتبارتر دەبێ لە هێرشەكانی 2014. ویلایەتەكانی دیكەی داعش لە دەرەوەی عێراق و سووریا سەرچاوەی جۆراجۆری دەخەنە بەردەست بۆ ئەوەی لەو دوو وڵاتە هەڵمەتی گورزوەشاندنی خۆی بەڕێوەبەرێ، لە كاتێكدا لە ئاستی جیهانیشدا گڕوتینێكی نوێ بەو رێكخراوە دەدەن.
داعش لە 31ی ئایاری 2019 ـەوە دەستپێكی هەڵمەتێكی جیهانیی نوێی بەناوی "شەڕی پەرتكردن" راگەیاند. دەزگای پڕوپاگەندی داعش داوای لە هێزەكانی ئەو رێكخراوە كرد بۆ ماوەیەكی كاتی دەست بەسەر ناوچەكاندا بگرن، ئەوەش وەك رێگەیەك بۆ پەرتكردنی نەیارەكانیان. توانای داعش بۆ هێرشی هاوكات لە عێراق و سووریا و دەرەوەی ئەو دوو وڵاتە هەلی نوێ دەخاتە بەردەستی ئەو گروپە. ئەگەر داعش لە بنیاتنانەوەی خەلافەت لە عێراق و سووریا سەركەوتووبێ، ئەوە شەپۆلێكی نوێی هێرشەكانی ئەو رێكخراوە لە ئەوروپا دەبینین كە رەوایەتی بە گوتاری داعش لەبارەی سەركەوتنی حاشاهەڵنەگری دەدات.
ئەمریكا هەڵەیەكی كوشندە دووبارە دەكاتەوە ئەگەر هەوڵەكانی بەرەنگاربوونەوەی داعش لە ئەولەویەتی خۆی لابدات. ئەمریكا دەبێ هەنگاوی دەمودەست بنێت بۆ لاوازكردنی ئەگەرەكانی سەرهەڵدانەوەی داعش لە عێراق و سووریا، بۆ ئەوەش دەبێ كشانەوەی هێزەكانی لە سووریا رابگرێت و هێزەكانی زیاد بكات.
پشتگیریی زیاتری ئەمریكا لە هەسەدە پێویستە. هاوبەش و هاوپەیمانەكانی ئەمریكاش دەبێ لەوەدا بەشداربن، بەڵام ئەمریكا دەبێ ئەوە بزانێت كە تاكە وڵاتە بتوانێ سەركردایەتی ئەو هەوڵە بكات. لەلایەكی دیكەوە، ئەمریكا دەبێ ئۆپەراسیۆنەكانی هاریكاری مرۆیی بكاتە كاری لەپێشینەی خۆی و فراوانتریان بكات تاوەكو بانگەشەكانی داعش لاواز بكات، بەتایبەتیش لەنێو ئەو خەڵكە كەم تەمەنە تۆقیوەی لە كەمپەكانی ئاوارەكان لە سەرتاسەری رۆژهەڵاتی نێوەڕاست دەژین. ئەم هەنگاوانە رێژە و ئاستی گەشەی دووبارەی داعش كەمدەكەنەوە و كاتی پێویست دەدەنە ئەمریكا بۆ ئەوەی ستراتیژێكی تۆكمە بۆ تێكشكاندنی راستەقینەی دابنێ و هەلومەرجی پێویست بۆ رێگری لە بنیاتنانەوەی داعش بڕەخسێنێ.
لە داهاتووشدا توركیا هەر دژی پشتگیرییە زۆرەكانی ئەمریكا بۆ هەسەدە دەوەستێتەوە. ئەمریكا دەبێ هەوڵەكانی زیاتر بكات بۆ بەرزكردنەوەی هێز و توانای لایەنە عەرەبییەكانی نێو هەسەدە كە هێندەی هێزە كوردییەكانی نێو هەسەدە هەڕەشە نین بۆ سەر توركیا. پشتگیریكردنی ئەو گرووپە عەرەبانە وادەكات ئەمریكا باشتر بتوانێ بەرەنگاری داعش ببێتەوە كە لە ناوچە عەرەبییەكان بەهێزترە. ئەو هەنگاوە وادەكات هەسەدە هێندە پشت بەو هێزە كوردییانە نەبەستێ كە توركیا دژایەتییان دەكات.
ئەمریكا دەبێ زیادكردنی هاوكارییەكانی خۆی بۆ هەسەدە مەرجدار بكات بەوەی چاكسازی لە رەفتاری خۆیدا بكات و دڵنیایی بدات كە هەسەدە نوێنەرایەتی عەرەب و كورد دەكات، بەبێ ئەوەی بایەخ بەوە بدرێت ئاخۆ ئەو هێزانە پشتگیری لە ئایدیۆلۆژیای سیاسی هەسەدە دەكەن یان نا. ئەم هەنگاوانە بە تەنیا بەس نین بۆ هێوركردنەوەی توركیا، بەڵام ئەگەری ئەوە كەمدەكەنەوە كە هەوڵە بەردەوامەكانی ئەمریكا بۆ دۆزینەوەی چارەسەرێكی درێژخایەن بۆ داعش لە عێراق و سووریا ململانێی زیاتریان لێبكەوێتەوە.
لە ئاداری 2019، ئیدارەی ترەمپ شكستی جوگرافیی دەوڵەتی ئیسلامی لە عێراق و شام راگەیاند. دەیان هەزار چەكداری عێراقی و سووری لەكاتی رزگاركردنی دانیشتووانی ژێر دەسەڵاتی داعش كە باجە هەرە قورسەكەیان دابوو، كوژران. سەرەڕای ئەوەش، داعش لە سەرتاسەری جیهان و لە ناوچە رزگاركراوەكان درێژەی بە هێرشە وێرانكەر و فرەلایەكانی دا. ئەو هێرشانە نیشانەی بێهیوایی نین، بەڵكو رەنگدانەوەی ستراتیژی ئاڵۆزی بەرگریی داعشن كە ئەو رێكخراوە لە كاتی بەشداریی ئەمریكا لە 2014ـەوە پەیڕەوی دەكات. داعش هەڵمەتێكی رێكخست بۆ ئەوەی رێ لە شكستی ستراتیژیی خەلافەتەكەی بگرێ و توانای خۆی وەك هێزێكی جووتەوانە بەكارهێنا بۆ ئەوەی هەلومەرجی گورزوەشاندنێكی نوێ بڕەخسێنێ كە ئێستا بەڕێوەیە.
دامەزراوە هەواڵگرییەكانی ئەمریكا مەزندە دەكەن هەڵمەتی گورزوەشاندنی داعش دەستپێبكاتەوە، بەڵام لەبارەی رێچكە و خشتەی كاتی سەرهەڵدانەوەی ئەو هەڵمەتە كۆدەنگییەكی ئەوتۆ نییە. لە ئایاری 2019 نووسینگەی پشكنینی گشتی OIGی سەر بە وەزارەتی بەرگریی ئەمریكا لە راپۆرتێكدا رایگەیاند كە ئاژانسی هەواڵگریی بەرگری و هێزە مەیدانییەكەی ئەمریكا لە هاوپەیمانی نێودەوڵەتی (CTJF/OIR) بۆچوونی جیاوازیان سەبارەت بە ئاستی جموجۆڵەكانی داعش بەدەست گەیشتووە.
هێزی مەیدانیی ئەمریكا لە هاوپەیمانیی نێودەوڵەتی بانگەشەی ئەوەی كردووە كە "چالاكییەكان"ی داعش بە بەراورد بە ساڵی 2018 "بەشێوەیەكی بەرچاو كز بوون"، لەكاتێكدا ئاژانسی هەواڵگریی بەرگری (DIA) لەگەڵ ئەو لێكدانەوەیە بۆ عێڕاق هاوڕا نییە. ئەو ناكۆكییە ئەوە دەردەخات كە جیاوازییەكی بەردەوام لەنێوان هەڵسەنگاندنی ئەو دامەزراوانە لەبارەی هەڕەشەی داعش هەیە. لە مانگی تەممووزی 2018 (DIA) مەزندەی كرد داعش تاوەكو 30 هەزار چەكداری لە عێراق و سووریادا هەبێ، لەكاتێكدا بە گوێرەی هەڵسەنگاندنەكانی ( (CJTF/OIR، دەبێ ژمارەی چەكدارانی داعش لە كانوونی یەكەمی 2017 بۆ 1000 چەكدار كەمی كردبێ. لەنێو شارەزایانیشدا دیبەیتێكی هاوشێوەی ئەوە هەیە.
داعش لە هێرشە گەورە و بەرچاوەكانی خۆی لە دەرەوە بەردەوامە كە دوایین نموونەیان لەكاتی جەژنی هەڵسانەوەی 2019 بوو لە سریلانكا. جگە لەوەش، داعش لە 2019 ژمارەیەكی زۆر ویلایەتی نوێی لە دەرەوەی عێراق و سووریا دروستكردووە، لەوانەش ویلایەتەكانی نێوەڕاستی ئەفریقا و هیندستان. چەندان ساڵە سیاسەتڤانان و ئەكادیمییەكان بۆچوونی جیاوازیان هەیە سەبارەت بەوەی ئایا هەنگاوە جیهانییەكانی داعش سەلمێنەری هەلپەرستیی داعشن یان نەخشەن بۆ هەڵمەتێكی سەركەوتوو. هەندێك كەسی وەك جۆن كێری، وەزیری دەرەوەی پێشووی ئەمریكا پێیانوایە هێرشە جیهانییەكانی داعش "هەوڵێكی هیوابڕاوی دوژمنێكە كە دەبینێ پێیان بە تەڵەوە بووە". هەندێكی دیكە هۆشداری دەدەن لەوەی هەڵمەتە جیهانییەكەی داعش ستراتیژێكی فرەڕەهەند و پێداگرییەكی لەبننەهاتووی ئەو رێكخراوە دەسەلمێنن.
پەیمانگەی توێژینەوەی جەنگ ISW مەزندەی ئەوە دەكات كە داعش وەك رێكخراوێكی سەربازیی پرۆفیشناڵی جیهانی ماوەتەوە. لایەنگرانی ئەو رێكخراوە تا ئێستاش داعش وەك گرووپێكی رەوا و بە توانا دەبینن، هەرچەند خەلافەتە فیزیكییەكەی لەدەستچووە. داعش هەر ئێستا لە عێراق و سووریا سەریهەڵداوەتەوە. ئەم راپۆرتە لەوە دەكۆڵێتەوە داعش چۆن دوای خۆدزینەوە لە شكستێكی تەواو، دەست بە هەڵمەتێكی نوێی گورزوەشاندن دەكات.
پێناسەی شكست
سوپای ئەمریكا "شكست" بەو ساتەوەختە پێناسە دەكات كە تێیدا "هێزی دوژمن بەشێوەیەكی كاتی یان هەمیشەیی ئامرازە فیزیكییەكان یان ویستی شەڕ لەدژی نەیارەكانی لەدەستدەدات". داعش دوژمنێكی سەختە بۆ تێكشكاندن. كادیرە سەرەكییەكانی هەمووكات ویستی شەڕیان هەیە، لەبەرئەوەی ناسنامە و ئامانجەكانی ئەو رێكخراوە لە بڕوای ئاینییەوە سەرچاوە دەگرن. هەر بۆیە ئەمریكا دەبێ ئامرازە فیزیكییە جەنگییەكانی داعش لەنێوبەرێت بۆ ئەوەی بتوانێ ئەو رێكخراوە تێكبشكێنێ. داعش لە كۆمەڵێك هێزی چەكداری لۆكاڵی پێكهاتووە كە بەیعەتیان پێداوە. یەكێك لە شێوازەكانی لەنێوبردنی ئامرازە فیزیكییەكانی داعش ئەوەیە هێزە سەربازییەكەی پارچەپارچە بكرێ، دواتریش بەشە پێكهێنەرەكانی ئەو رێكخراوە بە هاوكاریی هێزە هاوبەشە خۆجێییەكان تێكبشكێنرێ.
بەڵام داعش زۆر ئامرازی شەڕ بەكاردەهێنێ. (ISW) لە راپۆرتی ئاداری 2015یدا بەوجۆرە وەسفی داعش دەكات كە "رێكخراوێكی خاوەن بونیاد و رێسایە، بۆ زۆر ئاستی جەنگ بە مانا باوەكەی پلان دادەنێ و هەندێجاریش بڕیار دەدات شێوازی دیكەی شەڕ بگرێتەبەر كە هەندێكیان بەشێوەی هاوكات لەگەڵ شێوازەكانی دیكە پەیڕەو دەكات". ئەم شێوازانە مانۆڕی باوی جەنگی لەخۆدەگرن، لەوانەش:
ـ هێرشی راستەوخۆ بۆ سەر دوژمن بۆ بنبڕكردنی هێرشی دوژمن و گرتنی ناوچە.
ـ شەڕی پارتیزانی، واتە هێرشی یەكەی بچووك بۆ سەر هێزەكانی دوژمن بۆ كەمكردنەوەی كارایی جەنگی و دابەزاندنی ورەی دوژمن، پچڕاندنی ئۆپەراسیۆنەكانیان و كۆكردنەوەی هێزی پارتیزانیی نوێ.
ـ تیرۆر، واتە هێرشی گەورە و بەرچاو بۆ سەر ئامانجە مەدەنییەكان لەپێناو تۆقاندن و چاندنی تۆوی ترس لە دڵی خەڵكدا.
داعش لەنێو ئەو ئامرازانەدا هەڵدەبژێرێ و تێكەڵیان دەكات، ئەوەش نەك هەر بەپێی گۆڕانی تواناكانی، بەڵكو بەپێی ئەو گۆڕانكارییانەش كە لە مەیدانەكانی جەنگدا دێنە ئاراوە. شێوازە جۆراجۆرەكانی شەڕی داعش توانای خۆگونجاندن و هەڵسانەوەی رێكخراوەیی ئەو گروپەیان زیاتر كردووە. هەر بۆیە مەرج نییە لەنێوبردنی ئامرازی فیزیكی داعش بۆ یەكێك لە شێوازەكانی شەڕ وابكات ئەو رێكخراوە لەڕووی جەنگییەوە بێ توانا بووبێ یان تێكشكابێ.
داعش ئەزموونێكی كۆنی هەیە لە شكستدا، هەر ئەوەش وادەكات ئەو رێكخراوە توانای هەڵسانەوەی زیاتر بێت. هێرشەكانی 2007 هەتا 2009ی ئەمریكا لە عێراق، قاعیدەی عێراقی تووشی شكستێكی كاریگەر كرد. چەكدارانی قاعیدەی عێراق كە بەو قۆناغەدا تێپەڕین، وانەی باشیان وەرگرت لەبارەی ئەوەی چۆن دوای زیانی وێرانكەر درێژە بە خۆیان بدەن و هەڵسنەوە. گەورەبوونەوەی خێرای قاعیدە لە فۆرمی داعشدا و دەستگرتن بەسەر بەشێكی گەورە لە عێراق و سووریادا لەنێوان ساڵانی 2012 بۆ 2014، ئەوە دەسەلمێنێ كە ئەو رێكخراوە سوودی لە زۆر لەو وانانە وەرگرتووە.
داعش شارەزایی هەیە لەوەی دوای شكست تواناكانی خۆی زیندوو بكاتەوە، ئەوەش لەو رێكخراوەدا وەك رێباز یان نەخشەڕێیەكی لێهاتووە بۆ ئەوەی ئەو گروپە لەدوای زیانی گەورە جارێكی دیكە هەڵسێتەوە. كەوابێ، بۆ تێكشكاندنی داعش، ئەمریكا نابێ هەر بەوەندە قایل بێ كە داعش لەڕووی فیزیكییەوە توانای ئەنجامدانی شەڕی باوی نەبێ، بەڵكو دەبێ توانای ئەوەشی لێ ببڕێ كە شەڕی ناباو و تیرۆر هەڵگیرسێنێ، چونكە ئەو شێوازانە لە شەڕ توانای ژیانەوە بە داعش دەدەن.
ئەمریكا هەوڵیدا داعش وەك نیمچە دەوڵەتێك لە عێراق و سووریا تێكبشكێنێ. ستراتیژی ئەمریكا لەسەر ئەو مەزەندەیە دانرابوو كە داعش وەك سوپایەك (سوپایەك لە تیرۆریستان) ئەوەندە درێژە بە شەڕ دەدات كە هێزەكانی (CJTF/OIR) بتوانن ئەو گروپە لەنێوببەن، ناوچەكانی ژێر دەسەڵاتی كۆنترۆڵ بكەنەوە و رێكخستی ئەو گروپە تێكبشكێنن. هەر بۆیە وەزارەتی بەرگریی ئەمریكا چەند كیلۆمەتر چوارگۆشەیەك لە ناوچەیەكی وەك ئاماژەی سەرەكی بۆ پێشكەوتن لە دژی داعش لە عێراق و سووریا لە قەڵەم دا.
ئەمریكا و هاوپەیمانەكانی رێكخستنی داعشیان شێواند و بە هێزی سەربازیی گەورە توانای چەكداریی داعشیان بچووككردەوە، بەڵام نەیانتوانی توانای سەربازیی ئەو رێكخراوە بۆ شەڕ لەناوبەرن. بەشێك لەمەش بۆ ئەو ستراتیژە زیرەكانەیەی داعش دەگەڕێتەوە كە تێیدا خۆبنیاتنانەوەی خستووەتە پێش راگرتنی ناوچەكانی ژێر كۆنترۆڵی خۆی. ئەمریكا بە چاوی كەمەوە سەیری شێوازی دووسەرەی جەنگی داعشی كرد، لە كاتێكدا ئەو شێوازە توانای ئەوە بەو گروپە دەدا كە خۆی لەگەڵ گوشارە سەربازییەكاندا بگونجێنێ و هەرچەندە ناوچەكانیشی لە دەستدەدا، بەڵام دیسانیش خۆی لە شكست دەدزییەوە.
