دوێنێ چوارشەممە بەهۆی زیادبونی رێژەی نەوتی خاو لە عەمبارە نەوتەكانی ویلایەتە یەكگرتوەكانی ئەمریكا بۆ بەرزترین ئاستی خۆی لەماوەی یەک مانگدا، نرخی نەوتی خاو لە بازارەكانی جیهاندا بەڕێژەی زیاتر لەسەدا 1 کەمبوەوە.

لەجەلسەکانی پێشوی نرخی بازاڕدا، نرخی نەوتی خاو بەڕێژەی لەسەدا 3 کەمبوەوە.

بەپێی ئاژانسی رۆیتەرز، ئەمرۆ پێنجشەممە نرخی هەر بەرمیلێک لەنەوتی خاوی برێنت 69 سەنت دابەزی کە ڕێژەی لەسەدا 1.1ی نرخی پێشویەتی و بەوەش نرخی برێنت لە ( 63.66) شەست و سێ دۆلارو شەست و شەش سەنتدا جێگیربو. ئەمە لەکاتێکدا رۆژی سێشەممەی رابردو بەڕێژەی لەسەدا 3 نرخەکەی کەمبوبوەوە.

هاوکات، نرخی یەک بەرمیل نەوتی خاوی تەکساسی رۆژئاوای ئەمریکا 84 سەنت کەمیکرد کەڕێژەی لەسەدا 1.5ی نرخەکەی پێشویەتی و بەوەش لە 56.78 ( پەنجاو شەش دۆلار و حەفتاو هەشت سەنت)دا جێگیربو.

بەپێی داتاو زانیارییەکانی بەڕێوەبەرایەتی وزەی ئەمریکا، رێژەی نەوتی عەمبارەکانی ئەمریکا بەشێوەیەکی چاوەڕواننەکراو زیادکرا و بەهۆیەوە نرخی نەوتی خاو لەبازەڕەکاندا کەمبوەوە.

بەپێی زانیارییەکان لەماوەی 2 رۆژی رابردودا 1.3 ملیۆن بەرمیل نەوتی عەمبارکراو کەمی کردوە، واتە رەوانەی بازاڕەکانی جیهانکراوە و بەهۆیەوە نرخی نەوت کەمیکردوە.

ئەوە لەكاتێكدایە لەماوەی رابردودا گرژیی و ئالۆزیە ئابوریەكانی جیهان، بە تایبەتی جەنگی بازرگانی نێوان ویلایەتە یەكگرتوەكانی ئەمریكا و چین، هاوكات لەگەڵ زیاتربونی ئاڵنگاریەكانی نێوان ویلایەتە یەكگرتوەكان و ئێران، ئێران و وڵاتانی ئەوروپا، سەرجەمیان كاریگەریان لەسەر هەلكشان و داكشانی نرخی نەوتی خاو هەبوە.



خەندان