رێبەری باڵای کۆماری ئیسلامیی ئێران دان بەوەدا دەنێت، کە وڵاتەکەی بەهۆی سزاکانی ئەمریکا پەشۆکاو بووە.



رۆژی پێنجشەممە 4/10/2018، ئایەتوڵڵا عەلی خامنەیی، رێبەری باڵای ئێران لە وتارێکدا بۆ سەرباز و فەرماندەکانی سوپای وڵاتەکەی، رایگەیاندووە، ”گەلەکەمان شکست قبوڵ ناکات“.



عەلی خامنەیی ئەو بارودۆخەی ئێستای وڵاتەکەی بە ”قۆناغێکی هەستیار“ بۆ ئێرانییەکان بەهۆی سزاکانی ئەمریکا و قەیرانە داراییەکانی وڵاتەکەی، ناو دەبات.



چەند مانگێکە پەیوەندییەکانی تاران و واشنتن گەیشتوونەتە خراپترین ئاست و ئەمریکا ژمارەیەک سزای بەسەر ئێراندا سەپاندووە.



دوای کشانەوەی ئەمریکا لە رێککەوتننامەی ناوکی و سەپاندنی چەندین سزا بەسەر ئێران، دۆناڵد ترەمپ هەڕەشەی لە هەموو ئەو وڵات و لایەنانە کرد، کە یان دەبێ بچنە بەرەی ئێران یاخود پابەندی سزاکانی ئەمریکا بن بەسەر ئێران.



شەوی 8/5/2018، دۆناڵد ترەمپی سەرۆکی ئەمریکا بڕیاری کشانەوەی وڵاتەکەی لە رێککەوتنی ناوکیی ئێران و وڵاتانی پێنج + یەک، واژۆ کرد.



رێککەوتنی ناوکیی ئێران و وڵاتانی پێنج + یەک لە سەرەتای نیسانی 2015 لە شاری لۆزان لە سویسڕا واژۆ کرا، کە بەپێی ئەو رێککەوتنە ئێران دەستبەرداری دروستکردنی چەکی ناوکی دەبێت و ئەمریکاش سزاکانی لەسەر ئەو وڵاتە سووک دەکات.



وڵاتانی پێنج + یەک بریتین لە پێنج وڵاتی ئەندامی هەمیشەیی ئەنجومەنی ئاسایشی نێودەوڵەتی (ئەمریکا، فەرەنسا، رووسیا، بەریتانیا و چین) و ئەڵمانیا پێک دێت.




باسنیوز