حاجییەکی عێراقی لە کاتی تەوافکردن بە دەوری کەعبە (قیبلەی مسوڵمانان)، خۆی هەڵداوەتە خوارەوە و خۆی کوشتووە.



حاجی حوسێن حەمید حەیدەر کاتژمێر 8:30 خولەکی سەرلەبەیانیی رۆژی هەینی 24/8/2018 لەکاتی تەوافکردن (سووڕانەوە) بە دەوری کەعبە، لە سەربانی مزگەوتی حەرام خۆی هەڵدایە ناو گۆڕەپانی مزگەوتەکە و خۆی کوشت و دوو حاجیی دیکەی بریندار کرد.



بەپێی هەواڵی. میدیا سعودییەکان، حوسێن حەمید حەیدەری لەگەڵ دایکی بە مەبەستی ئەنجامدانی رێوڕەسمەکانی حەج سەردانی ئەو وڵاتەی کردبوو و ماوەی نزیکەی سێ مانگیش بوو بەهۆی لەدەستدانی کوڕێکییەوە، باری دەروونی تێک چوو بوو.



دایکی حاجی حوسێن حەمید حەیدەری دوای خۆکوشتنی کوڕەکەی، باری تەندروستیی تێکچووە و گەیەندراوەتە نەخۆشخانە.



ئەو حاجییە، کە خەڵکی شارەدێی نەهرەوانە لە پارێزگای بەغدا و لەدایکبووی ساڵی 1975 بوو. لەکاتی تەوافکردن چەند دروشمێکی مەزهەبی شیعەی گووتووەتەوە و بە شان و باڵی موقتەدا سەدری هەڵداوە، کە رێبەری رەوتی سەدرە و یەکێکە لە زاناکانی شیعەی عێراقی و سیاسەتمەدارێکی ئەو وڵاتە.





باسنیوز