هاوکات لەگەڵ پشتیوانیی چوار سیناتۆری کۆنگرێس لە شەپۆلی خۆپیشاندانەکانی ئێران، ئەکاونتی وەزارەتی دەرەوەی ئەمریکا لە تۆڕی کۆمەڵایەتیی (تویتەر) بە زمانی فارسی لە تویتێکدا پشتگیری لە ویستی خۆپیشاندانی خەڵکی ئێران کردووە.



لە ئەکاونتی فارسیی وەزارەتی دەرەوەی ئەمریکا لە (تویتەر) هاتووە: "ئێمە بە وردی چاودێریی خۆپیشاندان و ناڕەزایی خەڵک لە شارەکانی (ئیسفەهان، کەرەج، شیراز و تاران) دەکەن و هەروەک مایک پۆمپیۆ، وەزیری دەرەوەش ڕای گەیاندووە دۆخی تاڵی ژیان و گوزەرانی خەڵکی ئێران ئەوەیە کە حکوومەت و بەرپرسانی ئیران سەرقاڵی ئاخنینی گیرفانی خۆیانن، لە حالێکدا خەڵک بێکارن و برسییانە و بۆ ڕەخساندنی هەلیکار و گۆڕانکاری و بژیو، هاوار دەکەن".



لەبارەی خۆپیشاندان و ئاڵۆزیی شارەکانی ئێران، چوار سیناتۆری لە هەر دوو پارتی کۆماریخواز و دیموکراتی ئەمریکا بە بڵاوکردنەوەی ڕاگەیەندراوێک وێڕای پشتگیری لە ویست و داخوازی ڕەوای خۆپیشاندەرانی ئێرانی، داوایان لە ئەمریکا کردووە، هەوڵەکانی خۆی بخاتە گەڕ تا لە ڕێکخراوی نەتەوە یەکگرتووەکان کۆبوونەوەی بەپەلە و نائاسایی ڕێک بخەن و پێشێلکارییەکانی مافی مرۆڤ کە لەلایەن حکوومەتی ئێرانەوە دەکرێن، ئیدانە بکرێن و ڕێکارێک بۆ چاودێریی ئەو پێشێلکارییانە بگیرێتە بەر".



ماوەی پێنج ڕۆژە شەپۆلێکی نوێ لە خۆپیشاندان و ناڕەزاییەکانی لە شارە گەورەکانی ئێران وەک "ئیسفەهان، تاران، مەشهەد، شیراز، کەرەج، ساری و...." خەڵک لە ناڕەزایی بە بێکاری، گرانی و ناسەقامگیربوونی دۆخی ئابووری و بازاری دراو، دەستی پێکردووە.



ئەم خۆپیشاندان و ناڕەزاییانەی کۆمەڵگەی ئیران لە کاتێکدا سەریان هەڵداوە، کە بەرپرسانی باڵای ئەمریکا و ئێران، وەک دۆناڵد ترەمپ، حەسەن ڕۆحانی، محەمەدجەواد زەریف و چەند فەرماندەیەکی سوپای پاسداران لە ئاستی لێدوانی تونددا دژی یەکتر قسەیان کردووە.



گرژی و ئاڵۆزییەکانی نێوان هەردوو وڵات لە کاتێکدان، کە دۆناڵد ترەمپ سەرکۆماری ئەمریکا داوای لە ئێران کردووە کە بەبێ مەرج ئامادەی دانوستان و وتووێژە و ئەم پرسە بووەتە هۆی مشتومڕ و کێشە و ململانێی نێوان بەرپرسانی باڵای باڵە جیاوازەکان و بەشێک لە فەرماندە باڵاکانی سوپای پاسداران وەک "محەمەدعەلی جەعفەری و قاسم سلێمانی" بە توندی وەڵامی ئەمریکایان داوەتەوە و دانوستان لەگەڵ ئەو وڵاتەیان بە مەحاڵ لەقەڵەم داوە، بەڵام هەڵوێستی عەلی خامنەیی کە یەکلاکەرەوەی ئەم پرسەیە، هەتا ئێستا دیار نییە و بێدەنگە."






باسنیوز