وەزارەتی خەزێنەداریی ئەمریکا دوێنی دووشەممە کۆمپانیایەکی گەشتیاریی کەلە مالیزیایە، بەهۆی ئەوەی هاوکاریی کۆمپانیای فڕۆکەوانیی "ماهان ئەیر"ی ئێرانی کردووە، خستە لیستەی گەمارۆکانەوە.



کۆمپانیای فڕۆکەوانیی "ماهان ئەیر"ی ئێران ساڵی 2011 بە تاوانی یارمەتیکردنی فەیلەقی قودسی سەر بە سوپای پاسداران و گواستنەوەی هێز و چەکوچۆڵ بۆ سووریا و لوبنان خرایە لیستەی گەمارۆکانی ئەمریکاوە.



وەزارەتی خەزێنەداریی ئەمریکا لە ڕاگەیەندراوێکدا ئاشکرای کردووە کۆمپانیای خزمەتگوزاری و گەشتیاریی "ماهان" کە وەک کەرتی دابینکەر و فرۆشیاری کۆمپانیای فڕۆکەوانەیی "ماهان ئەیر" چالاکیی کردووە، خراوەتە لیستەی گەمارۆکانەوە.



بەپێی هەمان سەرچاوە هەموو سەرچاوە داراییەکانی کۆمپانیای گەشتیاریی "ماهان" لەلایەن ئەمریکاوە بلۆکە و دەستیان بەسەردا دەگیرێت.



ئەستیۆن منۆچین، وەزیری خەزێنەداریی ئەمریکا لەمبارەوە ڕای گەیاندووە کۆمپانیای فڕۆکەوانیی "ماهان ئەیر" هێڵی ئاسمانیی تایبەتیی فەیلەقی قودسی سەر بە سوپای پاسدارانە و چەک و چۆڵ و کەلوپەل و هێزەکانی ئەو گرووپە لە ڕۆژهەڵاتی ناوەڕاست دابین دەکات و بەتایبەتی پاڵپشتیی حکوومەتی بەشار ئەسەد دەکات و چەکوچۆڵ بۆ هێزەکانی سوپای پاسداران لە سووریا دەگوازێتەوە.



دوای هاتنە دەرەوەی ئەمریکا لە ڕێککەوتنی ئەتۆمی، بەشێکی زۆر لە گەمارۆکانی کەتی ئابووری، بازرگانی، نەوت و بەتایبەت ئەو کۆمپانیایانەی کە پەیوەندییان بە سوپای پاسدارانەوە هەیە، گەڕاونەتەوە.





باسنيووز