هێزەکانی یەکینەکانی پاراستنی گەل (یەپەگە)ی باڵی سەربازیی پارتی یەکێتی دیموکراتی (پەیەدە)، هێرشێکی فراوان دەکەن سەر بارەگاکانی رژێمی سووریا لە شاری حەسەکە لە کوردستانی رۆژئاوا.

سەرچاوەیەکی سەربازیی کوردی لەشاری حەسەکە لە کوردستانی رۆژئاوا بە ئاژانسی (فرانس پرێس)یراگەیاندووە، کە سەرلەبەیانیی رۆژی دووشەممە 22ـی ئابی 2016، هیزەکانی یەپەگە و ئاسایشی رۆژئاوا، هیرشیان کردووەتە سەر بارەگاکانی میلیشیای بەرگریی نیشتیمانیی سەر بە رژێمی سووریا.

ئەم هێرشە و ئاسایش دوای ئەوە دێت، کە دەسەڵاتداریی کوردی لە حەسەکە داوای خۆرادەستکردنی لە چەکدارانی سەر بە رژێمی سووریا کرد، بەڵام ئەوان رەتیان کردەوە خۆیان ردەست بکەن.

بەهۆی شەڕی نێوان هێزەکانی ئاسایش و یەکینەکانی پاراستنی گەل (یەپەگە) لەلایەن و چەکدارانی سەر بە رژێمی سووریا و بۆردومانی فڕۆکە جەنگییە سووری و رووسییەکانەوە، نزیکەی 40 هاووڵاتیی شارەکە گیانیان لەدەست داوە.

رۆژی هەینی 19ـی ئابی 2016، سوپای سووریا لە راگەیەندراوێکی فەرمیدا پاساوی بۆ بۆردومانکردنی شارەکە هێنایەوە و رایگەیاند، کە “ئاسایشی حەسەکە باڵی سەربازیی پەکەکەیە لە سووریا و نەوتی ئەو وڵاتە دەبەن و هاووڵاتییانی حەسەکە دەستگیر دەکەن”.

بۆ چارەسەرکردن و راوەستاندنی شەڕەکە، سەرچاوەیەکی ئەمنیی بەرپرس لە ئیدارەی خۆجێیی لە شاری قامیشلۆ رايگەیاند، کە شاندێکی ئەمنی-سەربازیی رووسی و سووری لە بنکەی سەربازیی حومەیمیمی سوپای رووسیا و دیمەشقەوە لە رێگەی فڕۆکەخانەی نێودەوڵەتی قامیشلۆوە گەیشتوونەتە قامیشلۆ.

دوای گفتوگۆیەکی یەک کاتژمێری، هەردوو شاندی هیزە کوردییەکان و رژێمی سووریا و رووسیا نەگەیشتوونەتە هیچ ئەنجامێک و بەهۆی هەڕەشەی شاندە سووری و رووسییەکە و رەتکردنەوەی داواکانیان، شاندی کوردی بە توڕەیی لە کۆبوونەوەکە چوونەتە دەرەوە، بەبێ ئەوەی بگەنە هیچ رێککەوتنێک.



















باسنیوز