پارێزگاری حەسەكە لە حكومەتی بەشار ئەسەد داوای دانوستاندن لە بەرپرسانی هێزەكانی پاراستنی گەل (یەپەگە) دەكات بۆ ئەوەی كێشەكان بە گفتوگۆ چارەسەر بكەن، تاوەكو ئێستاش هیچ وەڵامێكی بەرپرسانی پەیەدە و یەپەگە لە میدیاكان ئاشكرا نەكراوە.

محەمەد زەعال عەلی، پارێزگاری حەسەكە لە حكومەتی بەشار ئەسەد، سەبارەت بە پێكدادانەكانی نێوان هێزەكانی حكومەتی سووریا و یەپەگە و هێزە كوردییەكانی رۆژئاوای كوردستان گوتی "داوای دانوستاندن لە بەرپرسانی یەپەگە دەكەین و داواكارین لەسەر مێزی گفتوگۆ كێشەكانمان چارەسەر بكەین، بۆ ئەوەی ئارامی بۆ شاری حەسەكە بگەڕێتەوە."

دوای 5 رۆژ لە شەڕ و پێكدادانەكان و بەكارهێنانی فڕۆكەی جەنگی لەلایەن سووریاوە لە شاری حەسەكە كە گەورەترین پارێزگای رۆژئاوای كوردستانە، رۆژی شەممە 20ی ئابی 2016، محەمەد زەعال، پارێزگاری حەسەكە گوتی "ئەو چەك و تۆپانەی لەدەستی یەپەگەدان دەبێت بۆ شەڕ لە دژی داعش بەكاربهێنرێن."

شەڕەكە كاتێك روویدا، كە رۆژی 16/8/2016 هێزەکانی حكومەتی سووریا کاژێر 12:50 خولەكی نیوەڕۆ هێرشیانکردە سەر هاونیشتمانیانی مەدەنی لە گەڕەکەکانی ژێر کۆنترۆڵی ئاسایشی حەسەکە، وەک: بازاڕی شار و گەڕەکی نەوشای رۆژهەڵات، هێزەکانی ئاسایشیش وەڵامی هێرشەکەیان دایەوە و شەڕ لەنێوانیاندا سەریهەڵدا.

بەهۆی شەڕەكە دەیان هاونیشتمانی شەهید و برینداربوون. بۆیەكەمجار سووریا فڕۆكەی جەنگی لە شەڕی حەسەكە بەكارهێنا، بەم هۆكارەش بەشێكی خەڵكەكە ئاوارەبوون و ژیان لە شارەكە دژوار بووە، سوپای سووریاش دەیان كوژراو و برینداری هەیە. ئەمریكا بەفەرمی پشتگیری پەیەدە و یەپەگە دەكات لە شەڕی رووبەڕووبوونەوەی داعشدا، دوای ئەمەش ئەمریكا دوو فڕۆكەی جەنگی ناردنە ئاسمانی حەسەكە بۆ رێگریكردن لە فڕۆكە جەنگییەكانی سووریا.

لەدوای ساڵی 2011 و دەستپێكردنی شەڕی نێوخۆ لە سووریا و رۆژئاوای كوردستان كە دواتر پارتی یەكێتی دیموكراتی (پەیەدە) زۆربەی خاكی رۆژئاوای كوردستانی كۆنترۆڵكرد، سوپای سووریا لە شارەكانی حەسەكە و قامشلۆ بنكە و بارەگای ماون، تاوەكو ئێستاش چەندینجار شەڕ و پێكدادان لەنێوان هەردوولا هەڵگیرساوە.