دکتۆر عه‌لی دۆله‌مه‌ری نوێنه‌ری حکومه‌تی هه‌رێمی کوردستان له‌ فه‌ره‌نسا سه‌ردانی ئوفیسی رێکخراوی کامپوس فرانسی کرد کە رێکخراوێکی حکومەتی فەرەنسییە تایبه‌ته‌ بۆ کاروباری قوتابیانی بیانی.

شاندی نوێنه‌رایه‌تی له‌لایه‌ن ئێمێلی پولێ بەرێوەبەری بەشی روژهەڵاتی ناوەراست و سیرێنا ئەلین بەرپرسی قوتابیانی کورد و عیراق پێشوازی لێکران.

له‌م باره‌یه‌وه‌ دکتۆر عه‌لی دۆله‌مه‌ری نوێنه‌ری حکومه‌تی هه‌رێمی کوردستان له‌ فه‌ره‌نسا راگه‌یاند له‌م دیداره‌ باسمان لە بارودۆخی قوتابیانی کورد لە فەرەنسا کرد کە زۆر بە باشی ژیان و بارودۆخی خوێندنیان بەرێوە دەچێ و توشی هیچ گیروگرفتێک نەبووینە.

هه‌روه‌ها باسمان لە پرۆژەیەکی گرنگ کرد بۆ دابین کردنی کورسی ئەکادیمی لە زانکۆیەکانی فەرەنسا بۆ ئەو قوتابیانەی کە دەیانەوێت درێژە بە خوێندنی ماستەر و دکتورا لە فەرەنسا بدەن لە سەر حیسابی تایبەتی خۆیان، کە کامپوس فرانس و نوێنەرایەتی حکومەتی هەرێمی کوردستان لە فەرەنسا سەرپەرشتی گشت کارەکانیان دەکەن لە دابین کردنی ڤیزا، شوێنی نیشتەجێ بوون، قبولی زانکۆ و کارتی نیشتەجێ بوون و بیمەی تەندروستی و هتد..

له‌ کۆتایی لێدوانه‌که‌یدا نوێنه‌ری حکومه‌تی هه‌رێمی کوردستان له‌ فه‌ره‌نسا ووتی بۆ ئه‌م مه‌به‌سته‌ و هاوکات بۆ پتەوکردنی پەیوەندی ئەکادیمی نێوان فەرەنسا و هەرێمی کوردستان شاندێکی کامپوس فرانس سەردانی هەرێمی کوردستان دەکات لە ئایندەیەکی نزیکدا.