بنیامین نەتانیاهۆ سەرۆك وەزیرانی ئیسرائیل ئەو بەشە لە لێدوانەكەى پێنجشەمی رابردووی باراك ئۆباما سەرۆكی ئەمەریكای رەت كردەوە كە ئاماژە بەگەڕانەوەی دۆخی سنوورەكانی ئیسرائیل بۆ بەر لە ساڵی 1967 وەك دەسپێكی ئاشتی دەكا.

ماڵپەڕی (فیڵی)ی ئەمەریكایی ئەمڕۆ شەموو بڵاوی كردەوە، ئۆباما لە پەیامە تەلەڤزیۆنەكەی خۆیدا كە ئاراستەى هەموو جیهانی كرد و گرینگیی بەوڵاتانی عەرەبی و رۆهەڵاتی ناوەڕاست دا گوتی، پێویستە پرسی ئاشتیی فەلەستین و ئیسرائیل لەسەر بنەمای سنوورەكانی بەر لە ساڵی 1967ی فەلەستین و ئیسرائیل بێ، بەڵام ئیسرائیل رەتی دەكاتەوە.

نەتانیاهۆ گوتی، تەنیا راستییەكانی ئێستەى مەیدانەكە وەك بنەمای گفتوگۆی ئاشتی وەردەگیرێن و ناكرێ حاشا لە ئێستە بكەین و بۆ بەر لە ساڵی 1967 بگەڕێینەوە.

بەرزایییەكانی جولان و ناوچە شاخاوییەكانی باشووری ڕۆئاوای سووریا لە ساڵی 1967 پاش شەڕێكی 6 ڕۆژەی عەرەب و ئیسرائیل كەوتە بەردەستی ئیسرائیل و ساڵی 1980 لە لایەن كاربەدەستانی ئەو وڵاتە بەڕەسمی خرایە سەر ئیسرائیل، ئێستە لایەنە فەلەستینیەكان و سووریا چوونە ناو هەر پرسێكی ئاشتی لەگەڵ ئیسرائیل و پێشكەوتنی سیاسیی نێوانیان بەچۆڵكردنی ئەو ناوچانە و گەڕانەوە بۆ سنوورەكانی بەر لەو شەڕە دەبەستنەوە.

چەندان جار بۆ هێنانە ئارای ئاشتیی نێوان سووریا و ئیسرائیل و پتەوكردنی پرسی ئاشتی ڕۆهەڵاتی ناوەڕاست، پێشنیازی نێودەوڵەتیی خراونەتە ڕوو كە لە هەموویاندا باری پێوەندییەكانی سووریا، ئیسرائیل و لبنان گرینگییەكی زۆری هەبووە.