گوڵان/س.م

نه‌ته‌وه‌یه‌كگرتوه‌كان ئاشكرایی ده‌كات هه‌ردو حكومه‌تى ئێران و كۆریاى باكور ئاڵوگۆرِ به‌ ته‌كه‌نه‌لۆژیاى موشه‌ك ده‌كه‌ن.

ئه‌مرِۆ یه‌ك شه‌ممه‌، له‌رِاپۆرتێكى نهێنی نه‌ته‌وه‌یه‌كگرتوه‌كاندا كه‌ ئاژانسی هه‌واڵى رِۆیته‌رز بڵاوى كردۆته‌وه‌ هاتوه‌: به‌هاوكارى وڵاتێكى دراوسێى كۆریاى باكور هه‌ردو حكومه‌تى ئێران و كۆریاى باكور موشه‌كى دورهاوێژیان ئاڵوگۆرِ كردوه‌، كه‌ به‌پێى رِێككه‌وتنامه‌ى نێوده‌وڵه‌تى ئه‌و موشه‌كانه‌ قه‌ده‌غه‌ن.

به‌پێى هه‌واڵه‌كان هه‌ردو وڵات له‌رِێگه‌ى فرِۆكه‌وه‌ چه‌ندین كه‌ره‌سته‌ و چه‌ك و ته‌قه‌مه‌نیان ئاڵوگۆرِ پێكردوه‌.

چه‌ند سه‌رچاوه‌یه‌ك ئاشكرایان كرد كه‌ كۆریاى باكور و ئێران له‌رِێگه‌ى وڵاتى چین ئه‌و ئاڵوگۆرِه‌ ئه‌نجام ده‌ده‌ن.

رِاپۆرته‌كه‌ نیگه‌رانى نه‌ته‌وه‌یه‌كگرتوه‌كانى تێدا ئاشكرا ده‌كات له‌سه‌ر هاوكارى كردنى كۆریاى باكور و ئێران له‌لایه‌ن حكومه‌تى چین و پابه‌ندنه‌بونى حكومه‌تى چین به‌ سزاكانى نه‌ته‌وه‌یه‌كگرتوه‌كان به‌سه‌ر هه‌ردو وڵاتى ئێران و كۆریاى باكور به‌هۆى به‌رده‌وامبونیان له‌سه‌ر به‌رنامه‌ ئه‌تۆمیه‌كه‌یان.

سه‌رچاوه‌/ رِۆیته‌رز