گوڵان/س.م


هێرشه‌كان بۆسه‌ر حكومه‌تى لیبیا به‌رده‌وامه‌ و قه‌زافی رِه‌تى ده‌كاته‌وه‌ ده‌سه‌ڵات جێبهێڵێت و جه‌خت له‌سه‌ر به‌ره‌نگاربونه‌وه‌ى خۆپیشانده‌ران ده‌كاته‌وه‌.

بۆ رِۆژى چواره‌م بۆردمانى وڵاتانى نێوده‌وڵه‌تى بۆسه‌ر حكومه‌تى لیبیا به‌رده‌وامى هه‌یه‌ له‌شارى ته‌رابلوسی پایته‌ختى ئه‌و ولاته‌ و چه‌ندین ئامانجى سه‌ربازى ئه‌و وڵاته‌یان پێكاوه‌، به‌ڵام تائێستا شوێنى بۆردومانه‌كان و ژماره‌ى زیانه‌كان نه‌زانراوه‌.

له‌به‌رامبه‌ردا حكومه‌تى لیبیا به‌سه‌ركردایه‌تى موعه‌مه‌ر قه‌زافی هێرشه‌كانى بۆسه‌ر هه‌ریه‌ك له‌ شاره‌كانى (مه‌سراته‌) و (زه‌نتان) چرِ كردۆته‌وه‌ و به‌رده‌وامه‌ له‌ رِاوه‌دونان و تۆپباران كردنى خۆپیشانده‌ران.

له‌وته‌یه‌كیدا كه‌ كه‌ناڵى لیبی په‌خشى كرد،\"موعه‌مه‌ر قه‌زافی\""سه‌رۆكى لیبیا به‌ڵێنى دا به‌تێكشكاندنى هێزى هاوپه‌یمانان كه‌ له‌ئێستادا به‌رده‌وامن له‌بۆردمان كردنى بنكه‌ سه‌ربازیه‌كانى حكومه‌تى لیبیا، و هێرشه‌كان بۆسه‌ر حكومه‌ته‌كه‌ى به‌ پێچه‌وانه‌ى په‌یمانى نه‌ته‌وه‌یه‌كگرتوه‌كان ناوبرد.

قه‌زافی، وتیشی: خۆپیشاندان له‌ زۆرینه‌ى وڵاتانى ئه‌وروپا و ئاسیا هه‌یه‌، و سه‌رجه‌م گه‌لانى جیهان پشتگیری گه‌لى لیبی ده‌كه‌ن.

له‌لایه‌كى تره‌وه‌ باراك ئۆباما سه‌رۆكى ئه‌مه‌ریكا داواى له‌ موعه‌مه‌ر قه‌زافی كرد ده‌ستبه‌ردارى پۆستى سه‌رۆكایه‌تى لیبیا ببێت و نه‌بێته‌ هۆى كوشتنى هاوڵاتیانى ئه‌و وڵاته‌ له‌پێناوى پۆسته‌كه‌یدا.

سه‌رچاوه‌/ ئه‌لجه‌زیره‌"