D. Şivan, mamosteyê zanîngehê li Hewlêrê: Rêzgirtin li encamên sindoqa dengdanê,
bingeha sereke ya demokrasiyê û parastina mafê dengderên Kurdistanê ye.

Serok Barzanî bi pêşkêşkirina vê destpêşxeriya nû, careke din selmand ku her tim
wek sîwaneke (çetireke) komker bo hemû aliyên siyasî yên Herêma Kurdistanê
dimîne. Ev hengava girîng, derbirîneke zelal e ji xemxwarî û dilsoziya berdewam
a cenabê wî bo parastina berjewendiyên bilind ên gelê Kurdistanê; lewma jî ji
aliyê raya giştî û navendên siyasî ve bi giranbuha û girîng tê nirxandin. Yek ji
xalên herî cewherî yên vê destpêşxeriyê, pêdagirtina li ser wê yekê ye ku pêwîst
e hemû kêşe û giriftên siyasî, li şûna ku bibin nav medyayê û ser şeqaman, bên
ser maseya danûstandinê û di keşekî aram de bên çareserkirin. Ev hewldan dibe
sedema duristkirina celebek ji seqamgiriya siyasî ya demdirêj li Herêma
Kurdistanê, bi taybetî di vê qonaxa hestiyar a niha de ku herêm bi giştî ber bi
guhertinên pir bilez û çarenivîssaz ve hengavan dihavêje. Ev barûdox jî wiha
dike ku hemû alî bi peroşî ber bi guftûgoyê ve biçin.

Em dikarin bi geşbîniyê ve li paşerojê binerin û bêjin ku çareserkirina giriftan
bi rêya diyaloga rastîn dibe. Ji vê perspektîfê ve, hemû hêzên siyasî bo
parastina seqamgiriya niha û jinûve avakirin û vejandina nîştiman û çalakkirina
proseya siyasî, hewlên xwe yekxistine û çir kirine. Niha tevgereke germ û piralî
û erênî di navbera hêzan de tê dîtin bo pêşwazîkirina li vê destpêşxeriya
nîştimanî ya dîrokî. Ev danûstandin ji ber ku dûrî qerebalixa medyayî û
milmilaniyên ser şeqaman tên encamdan, hêviyeke mezin didin ku encamên baş jê
derbikevin, ji ber ku kombûna aliyan di bin sîwana Serok Barzanî de garantiya
serkeftina vê proseyê ye.

Derbarê daxwazên Yekîtiya Niştimaniya Kurdistanê wek aliyekî siyasî yê sereke,
dibe ku ew bixwe wiha bifikirin ku daxwazên wan rewa ne, lê pêwîst e prensîbên
sîstema demokrasiyê li ber çav bên girtin. Di civaka me de demokrasiya
hilbijartinê bingeha hikûm raniyê ye û divê em rêzê li dengê dengderan bigirin.
Gava ku dengder bi azadî û di keşekî demokratîk de aliyekî hildibijêrin, ew alî
şerîyeta fermanrewayiyê bi dest dixe. Di vê sîstemê de, sindoqên dengdanê
giraniya rastîn a aliyan diyar dikin û nîşan didin ka kî şayesteyê îdarekirina
welat e.

Destpêşxeriya cenabê Serok, xaleke bingehîn e bo wê yekê ku hemû alî, çi ewên
xwe bi mexdûr dizanin û çi aliyên serkeftî, bi hev re kom bibin. Gelek caran
hêzên serkeftî jî ji bo parastina yekrêziya nîştimanî û aştiya civakî, ji beşek
ji maf û îmtiyazên xwe derbas bûne. Lewma pêwîst e hemû ew aliyên ku li gorî
encaman ne pirranî ne, rewşa niha qebûl bikin û bi şanazî ve pabendî vê
destpêşxeriyê bibin, ji ber ku ev tenê rêya durist û guncaw a parastina qeyaneya
Herêmê ye.

Di vê rewşa tije ji alengariyan de, partiyên siyasî bi taybetî Partiya Demokrat
a Kurdistanê û Yekîtiya Niştimaniya Kurdistanê, divê bi ruhiyeteke
berpirsiyaranە serederiyê bikin. Armanca hevbeş a hemûyan pêwîst e yekxistina
mala kurd û parastina qeyaneya Herêma Kurdistanê be, bo wê yekê ku bi hev re ber
bi qonaxeke nû û aramter hengavan bihavêjin. Di vê çarçoveyê de, helwesta
Yekgirtûya Îslamiya Kurdistanê di pêşwazîkirina li vê hengavê, nîşana xemxwarî û
hîskirina bi berpirsiyariya nîştimanî ye, ku şayesteyê destxweşî û pêzanînê ye.
Hêvîdar in aliyên din jî bi heman ruhiyetê ve ber bi pêş ve biçin.

Parastina destkeftên niha yên Herêma Kurdistanê, erkeke dîrokî ye li ser milê
hemû aliyan. Tenê bi rêya jihevtêgihiştin û yekgirtuyiyê em dikarin rûbirûyî wan
metarsiyên derveyî bibin ku paşeroja me dikin armanc. Lewma cîbicîkirina vê
destpêşxeriya nîştimanî, xizmeteke mezin e bo seqamgiriya herêmê û dibe sedem ku
hemû gelê Kurdistanê di keşekî aram û tije ji tebayiyê de bijî û ber bi
paşerojeke pir geştir û seqamgirtir her tim hengavan bihavêje.