29 sal bi ser koçberiya milyonî ya gelê kurd li Başûrê Kurdistanê re derbas dibe. Tê gotin ku ew koçberî mezintirîn nerazîbûna sivîl e li hember dagîrkeriya Kurdistanê.

29 sal berê û roja 31 Adara 1991, rêjîma wê çaxê ya Iraqê bi serokatiya Sedamê gor bi gor, ji kerba raperîn û serhildana mezin ya 21 Adara heman salê, ku bibû sebeba rizgarbûna beşek mezin ji xaka Başûrê Kurdistanê, dest bi êrişeka hovane û berfireh li dijî gelê kurd û Kurdistanê kir.

Xelkê Başûrê Kurdistanê jî bi redkirina serdestiya wê rêjîma zalim, koçber bûn û rastî zorî û zehmetiyên mezin hatin û berê xwe dan Bakûr û Rojhilatê Kurdistanê.

Gelek kes bi taybet jin û zarok ji ber serma û birçîbûnê can dan.

Dijmin dixwast tevahiya Başûrê Kurdistanê ji nû ve dagîr bike lê li deverên Soran, Balekayetî û Hacî Omeran rastî bertek û bersiva tund ya Pêşmerge hat.

Hêzên Pêşmerge bi fermandehiya Serok Mesûd Barzanî karîn derbên giran li dijmin bidin û dijmin neçarî danûstandinê bikin.

Yek ji wan şer û destanên ku tirsek mezin xist nav dilê dijmin, destan û mêrxasiya Korê bû. Şerê Korê 5 rojan kişand û hêzên Pêşmerge serkeftinek mezin bi dest xistin.

Pisporên siyasî koçberiya milyonî ya gelê Başûr wek mezintirîn nerazîbûna sivîl li hember dagîrkeriya Kurdistanê dibînin, şerê Korê jî mîna şerê Pirdê û Sihêla yên li dijî dagîrkeriya rêjîma niha ya Iraqê hatibûn kirin, dibînin û dibêjin, rûdanên han karîn hevkêşeyên siyasî bi sûda gelê Kurdistanê bidin guhertin.

Basnews