Li welatên Ewropayê hejmara yên bi vîrusa koronayê ketine 200 hezar kes derbas kir, herî zêde jî li ‎Îtalya, Spanya, Almanya û Fransayê xelk bi wê vîrusê ketine.‎

Vîrusa koronayê dawiya Çileya 2020ê gihişte welatên Ewropayê û belav bû, lê di demeke kurt de, ‎gelek kes li welatên Ewropayê bi wê vîrusê ketin.‎

Îtalya yekem welatê Ewropayê ye ku hejmara herî zêde ya kesên pê ketine lê hatiye tomarkirin, heta ‎niha li wî welatî 69 hezar û 176 kes bi wê vîrusê ketine, 8 hezar û 326 kes baş bûne û 6 hezar û 820 kesan ‎jî canê xwe ji dest dane.‎

Piştî Îtalya, Spanya, Almanya û Fransa tên ku tenê li van hersê welatan nêzîka 100 hezar kes bi vîrusa ‎koronayê ketine.

Li cîhanê bi giştî heta niha 422 hezar û 959 kes bi vê vîrusê ketine, 109 hezar û 143 kes ‎baş bûne û 18 hezar û 907 kesan jî canê xwe ji dest dane.