Peyvdarê Hevpeymaniya Navdewletî ya li dijî DAIŞê ragihand, çaksaziyên Wezareta Pêşmerge derfeteke baş e, ji bo Amerîka û Hevpeymaniya Navdewletî zêdetir hevkariya Wezareta Pêşmerge bikin.

Peyvdarê Hevpeymaniya Navdewletî Myles Caggins ji K24ê re ragihand: “Dixwazin Pêşmerge bikin bihêztirîn û rêkxistintirîn hêz, bi awayekî ku gelekî ji berê cuda be.”

Myles Caggins got: “Hevpeymaniya Navdewletî ya li dijî DAIŞê bi piştevaniya Wezareta Pêşmerge di şerê li dijî paşmayên DAIŞê de berdewam e. Hîna DAIŞ li Mexmûr û Diyale gef e. Herwiha di rahênankirina Pêşmerge li ser teknîka şerê li dijî DAIŞê berdewam dibin”.

Diyar kir jî: “Hevpeymanî ku gelek welatên wek Îtalya, Almanya, Hingarya, Brîtanya û Finlenda lixwe digire, çalakiyên wan li Herêma Kurdistanê ne. Amerîka piştevaniya Pêşmerge kiriye û çaksaziyên Wezareta Pêşmerge jî, derfeteke baş e, ji bo em di hevkariyan de berdewam bin, ji bo Pêşmerge bibe bihêztirîn, birêkxistintirîn û bibandortirîn hêze û ji berê cuda be. Çavê me li wê ye, hevkariya zêdetir bi asayiş, Wezareta Pêşmerge û hemû hêzên ewlehiyê yên Herêma Kurdistanê re bikin”.

Demek e bi hevahengiya bi hêzên Hevpeymaniya Navdewletî re, Wezareta Pêşmerge bernameya çaksaziyê û xwerêkxistinkirê ragihandiye.

K24