Wezareta tenduristiya Kurdistanê: Li Hewlêrê jî kesek bi nexweşiya Koronayê ketiye
Wezareta tenduristiya Kurdistanê di daxuyaniyekê de ragihand ku têsta Koronayê bo 27 kesan hatiye kirin û di encamê de têsta jinekê pozîtiv bûye.
Li gor daxuyaniya Wezareta tenduristiyê, ew jina ku bi nexweşiya Koronayê ketiye, temenê wê 33 sal e û xelka Hewlêrê ye.
Wezareta tenduristiyê di daxuyaniya xwe de dibêje, “Em daxwaz ji hemû aliyan dikin ku pabendî biryarên Hikûmeta Herêma Kurdistanê û Wezareta Navxwe û rêkar û rênimayiyên Wezareta Tenduristiyê yên ji bo rûbirûbûna vîrûsa Koronayê bin û ji bo dîtina kesên gumanbar alîkariya tîmên tendirustiyê bikin.”
Bi nexweşa Hewlêrê re hejmara kesên ku heta niha li Herêma Kurdistanê bi nexweşiya Koronayê ketine, gihîşt 9 kesan ku yek ji wan miriye û yên din jî rewşa wan baş e. Piraniya wan jî li Silêmaniyê ne.
Herwiha li gor agahiyên wezareta tenduristiyê, hejmara kesên hatine qerentînekirin 2804 kes in û li 30 cihên cuda de hatine qerentînekirin û 982 kes ji wan vegeriyane nav kes û karên xwe.
Wezareta tenduristiyê hemwelatiyan piştrast dike ku ew dê berdewam bin li ser karê pêwîst bo rêkarên xweparastinê û dîtina gumanbaran.
Basnews
