Siyasetmedarekî sunnî yê Iraqî dibêje, hetanî kurd nebe şirîkê hikûmeta nû ya Iraqê, ew deng nadin hikûmetê.

Siyasetmedarê sunnî yê Iraqî, Xemîs Xencer ji televîzyona Iraqî ya “Alsumaria” TV re gotiye, pîvan û usûlên siyaseta serokwezîrê nû yê Iraqê Mihemed Ellawî, bi arîşe û kêşe ne.

Xemîs Xencer her wiha gotiye, zehmet e parlementoya Iraqê kabîneya Mihemed Ellawî pesend bike ji ber ku yên piştevanên wî bûn, niha ew jî nîgeran û nerazî ne.

Wî siyasetmedarê Iraqî daye zanîn, eger kurd û sunnî nebin şirîkên hikûmetê ew hikûmet bi ser nakeve û gotiye, eger kurd beşdarî hikûmetê nebin sunnî jî deng nadin hikûmetê.

Bi gotina wî siyasetmedarê Iraqî, Mihemed Ellawî, xeletiya ku Heyder Ebadî kiribû, dubare dike û dixwaze kurdan piştguh bixe, ev jî hebûna Iraqê dixe metirsiyê.

Parlementoya Iraqê îro hikûmeta nû ya Iraqê bi serokatiya Mihemed Ellawî pesend dike.

Basnews