Amerîka: Plana me nîne leşkeran li ser sînorê Tirkiye-Sûriyê bicîh bikin
Wezîrê Berevaniyê yê Amerîkayê Mark Esper û serokerkanê Amerîkayê General Mark Milley li Komîteya Xizmetên Çekdarî ya Encûmena Nûneran a Amerîkayê derbarê budçeya berevaniyê ya 2021ê de bersiva pirsan dan.
Derbarê hebûna leşkerên Amerîkayê de li Sûriyê, Serokerkanê Amerîkayê Mark Milley, ragihand ku berî êrîşa Tirkiyê bo ser bakurê rojhilatê Sûriyê, leşkerên wan ji herêmê vekişiya ne û ligel destpêkirina êrîşê leşkerên nêzîkê sînor bo rojhilat hatine veguhestin.
Milley got: “Erkê me yê li Sûriyê neguheriye. Erkê me, li rojhilatê Sûriyê şerê dijî DAIŞê ye. Herwiha ti plan û nêteke me ya wiha nîne careke din leşkeran li ser sînorê navbera Tirkiye-Sûriyê bicih bikin.”
Wezîrê Berevaniyê yê Amerîkayê Mark Esper jî da zanîn ku armanca Amerîkayê li Sûriyê ew e li navçeyên petrolê careke din DAIŞ zindî nebe û got: “Di qonaxa niha de egereke wiha naxuyê leşkeran bişînin herêma ser sînor.”
Rudaw
