Li bajarê Efrînê yê Rojavayê Kurdistanê piştî dagirkirinê cara yekem Dêra Minare ya Încîliyê hate vekirin

Bajarê Efrînê 18ê Adara 2018an ji aliyê Tirkiye û grûpên çekdar ên nêzikî wê ve hatibû dagirkirin.

Piştî dagirkirinê bi sed hezaran Kurd ji mal û milkên xwe bûn û ketin ser rê û dirbên koçberiyê.

Piştî 7 salan cara yekem Xirîstiyanên Efrînê deriyê Dêra Minare ya Încîlî ya wî bajarî vekirin û cejna Christmasê pîroz kir.

Xirîstiyanên Efrînê dua û îbadetên xwe bi Kurdî kirin.

"Xwedê nîmetek da me ku piştî 7 salan em li bajarê xwe navê Xwedê bilind bikin"

Keşeyê Dêra Minare ya Încîliyê ya Efrînê Şêro Şera piştî dîsa vekirina dêrê kêfxweşiya xwe anî ziman û got "Xwedê nîmetek da me ku piştî 7 salan em li bajarê xwe navê Xwedê bilind bikin."

Piştî ku bajarê Efrînê hat dagirkirin, ev dêr hat daxistin û êdî cihekî ku Xirîstiyan lê îbadetê bikin tinebû.

Lê niha deriyê vê perestgehê dîsa hatiye vekirin û bawermendan jidayîkbûna Îsa Mesîh pîroz kir.

Li bajarê Efrînê Xirîstiyan, Misilman û Êzidî hemû bi hev re di nava aramiyê de dijiyan.

Lê piştî 2018an ji ber guvaşên li ser baweriyên ji bilî misilmaniyê piraniya Êzidî û Xirîstiyanan warê xwe Efrîn bi cî hişt û niha hejmareke gelekî kêm Xiristiyan li wî bajarî maye.

 

Rudaw