Li Enqereyê li gel Serokkomarê Tirkiyeyê civiya.

Êwara îro pêncşem Serokê herêma Kurdistanê Nêçîrvan Barzanî serdana Tirkiyeyê kir û li Enqereyê li gel Serokkomarê Tirkiyeyê Receb Teyyib Erdogan civiya.

Serokatiya Herêma Kurdistanê li ser civînê daxuyaniyek belav kir û ragihand ku di civînê de peywendiyên Iraq û Herêma Kurdistanê, rewşa siyasî ya Iraq û Herêma Kurdistanê bi taybetî piştî destbikarbûna kabîneya nû ya hikûmeta federal a Iraqê, pêwendiyên Hewlêr û Bexdayê, Kurdistan û Tirkiye di warê siyasî û enerjiyê de, hatin gotûbêjkirin.

Serokatiya Herêma Kurdistanê anî ziman, “Her du aliyan tekezî li ser xwesteka dualî ji bo pêşxistina peywendiyên di navbera Herêma Kurdistanê û Tirkiyê di hemû waran de, bi taybetî di warê bazirganî û aborî de û sûdwergirtina ji derfetan bo berfirekirina hevkariyên hevbeş di navbera Iraq û Herêma Kurdistanê li gel Tirkiyê di warê enerjiyê de kirin. Her wiha valahî û pêwîstiya îro li cîhanê bi taybetî li Ewropayê di warê enerjî û gaza xwezayî de hat gotûbêjkirin.”

Di beşeke din a daxuyaniya Serokatiya Herêma Kurdistanê de hat diyarkirin, Erdogan û Barzanî li ser giringiya bihêzkirina hevkarî û hemahengiya navbera Iraq û Herêma Kurdistanê ligel Tirkiyê “ji bo parastina ewlehiya sînoran û dawî pêşhatên şerê dijî terorîstan û metirsiya DAIŞê li Iraq û Sûriyê gotûbêj kirin.”