Tevgera Azadî eşkere dike, Yekîtiya Niştimanî ya Kurdistanê (YNK) baregehên wan li ser daxwaza Tirkiyê girtiye.

Tevgera Azadî di derbarê girtina baregehên xwe de daxuyaniyek belav kir û bersiva Serkonsolê Hewlêrê yê Tirkiyeyê da. Tevgera Azadî dibêje, mafê konsolî nîn e wan wekî terorîst binav bike û destêwerdana karên navxwe ya Iraqê bike.

Herwiha Tevgera Azadî dibêje, “Daxuyaniyên konsolê Tirkiyeyê eşkere dike, YNK fermana girtina baregehên Tevgera Azadî ji Tirkiyê wergirtiye. YNK biryarek neyasayî û nehikûqî daye û ew bi ti awayî bêdeng namînin û dê hemû rê û rêbazên yasayî bikar bînin.”

Di çend rojên bûrî baregehên Tevgera Azadî ya ser bi PKKê ve li Koya û Kalar hatibûn girtin û moleta 24 demjimêran jî ji bo girtina baregeha wan li Silêmaniyê hatibû dayîn.

Li ser vê yekê jî Serkonsolê Tirkiyê yê li Hewlêrê Hakan Karaçay gotibû: “YNK li dijî Tevgera Azadî biryareke rast daye. Divê hinceta biryara YNK terorîstbûna Tevgera Azadî û PKK be. Divê Yekîtî terorîstbûna van rêxistinan ji biryara xwe dûr negire. Heger pirsa terorê çareser bibe dê pêwedniyên me yên dualî jî baş bibin.”

K24