Şêwirmendê civata ewlekariya Kurdistanê Mesrûr Barzanî di hevpeyvînekê de li gel malpera Almonîtor ya Amerîkî ragihand, ku ti carî xewna serxebûna Kurdistanê namire û got: Proseya referandumê giring bû, daku hemû civaka navdewletî û bi taybetî jî Hikûmeta Iraqê hez û viyana gelê Kurdistanê ji bo serxebûnê bibînin.

Mesrûr Bazranî ragihand ku ew gava Kurdan avêt, ne tawan bû, ew tenê eşkere kirina xwesteka gelê me bû û rawestana civaka navdewletî li dijî wê xwestekê, beruvajî hemû bingeh û pirensîpên Netewên Yekgirtî bû.

Di berdewamiya axiftna xwe de, Mesrûr Barzanî eşkere kir, ku wan berî referandumê, bi gelek welatan re ew yek behs kirin û ti welatekî tev Iraqê jî, dijatiya xwe ji bo mafên çarenivîs û serxwebûna Kurdistanê neda xuyakirin.

Di roja 25ê Îlona sala derbasbûyî de, li seranserî Herêma Kurdistanê û Kerkûkê û navçeyên din yên Kurdistanî, referanduma serxwebûnê hat encamdan û 93% ji beşdarbûyan, deng ji bo serxwebûna Kurdistanê dan.