Li navçeya Şiyê ya Efrînê pevçûnên giran di navbera Yekîneyên Parastina Gel (YPG) û artêşa Tirkiyê de derketin.

Peyvdarê YPGê li Efrînê, Birûsk Hesekê ji K24ê re ragihand, şer û pevçûnên giran di navbera hêzên wan û artêşa Tirkiyê û grûpên ser bi wê ve li derdora gundê Çeqela ya navçeya Şiyê derketin û ta niha şer bi dijwarî li wê eniyê dewam dike.

Li gor zanyariyên K24ê jî, şer û pevçûn li gundên Dêwa û Dêr Belûtê yên ser bi navçeya Cindirêsê ve jî bi dijwarî didome.

Êrîşa artêşa Tirkiyê û çekdarên ser bi wê ve îro derbasî roja xwe 27emîn bûye û ta niha li topbaran û bombebarana wan li hemû navçeyên Efrînê berdewam e.

Di çend rojên dawiyê de topbarana artêşa Tirkiyê gihêşt gundên nêzîkî Efrînê wek Ciwêq, Eyn Hecer û Stêr û Turindê.

K24