UNICEFê bal kişand ser kuştina zarokan li parêzgeha Efrînê ya Rojavayê Kurdistanê û ragihand ku di êrîşên artêşa Tirkiyê de herî kêm 11 zarok hatine kuştin.



Derbarê operasyona Efrînê de Nûnerê UNICEFê yê Sûriyê Fran Equiza daxuyaniyek da û bal kişand ser kuştina zarokan a li Efrîn û Îdlibê.



Equiza da zanîn ku li gor agahiyên gehiştine destê wan li herêma Efrînê ya Rojavayê Kurdistanê herî kêm 11 zarokan canê xwe ji dest dane û pirsî: “Gelo çima cîhan li hemberî kuştina zarokan bêdeng e?”



Equiza diyar kir ku gelê sîvîl ji bo xwe ji bombardimanan biparêze, diçin cihên din ên Efrînê û got, niha 125 hezar koçber li kampan dijîn.



Li gor Komîteya Tendirûstiyê ya Kantona Efrînê, ji ber bombardimanan cenazeyê 32 kesan gehiştine nexweşxaneyan. Di bomberdûmanan de 8 zarokan canê xwe ji dest dane û 49 kes jî birîndar bûne.

Rudaw