Serok Barzanî li gel nunerên şêniyên devera Sergeran civiya
Duh li Selahedînê Serok Barzanî li gel hijmarek rêdîn spî û nunerên şêniyên devera Sergeran civiya.
Di civînê de rêdîn spî û nûnerên şêniyên devera Sergeran dilgiraniyên xwe û şêniyên deverê li hember destpê kirina prosesa bi ereb kirinê anîn ziman û herwiha bi awayekî berfire behsa rewşa wan deveran ji bo Serok Barzanî kir.
Şanda mêwan di berdewamiya axaftinên xwe de piştgîriya xwe û şêniyên deverê bo hêzên pêşmerge diyar kir û daxwaz ji Serok Barzanî kirin daku sînorek bo prosesa biereb kirinê yaku ji aliyê artêşa Îraq û heşda şebî ve li deverê de hatiye destpêkirin deyne.
Di berdewamiya civînê de Serok Barzanî jî behsa prosesa biereb kirin di dema rejîma Besê de kir û ragihand ku biereb kirin zilim û neheqiyeke gelek mezine û cudaye ji her babeteke din.
Serok Barzanî diyar kir ku gelê Kurdistan xwedan exlaq û çandeke zengîne û rêz ji netewe û olên din digire û got: Em ti carê naxwazin ku kêşeyên siyasî yên di navbera hikûmetan bibin sedema şerê navbera netewan û li gel vê yekê jî prosesa biereb kirinê proseseke metirsîdar û sitemkaraneye ku derheq bi gelê Kurd û şêniyên deverê de tê kirin.
Serok Barzanî amadebûyên civînê ji vê yekê piştrast kir ku gelê Kurdistanê li pişta wane û her rêyek bo dawî anîn bi prosesa biereb kirinê digre ber xwe û hewl dide dawî bi vê prosesa dij mirovatî bihêne û rewşa wan deveran normal bibe jiber ku bierebkirin, zordarî û binpê kirina mafên şêniyên wan deveran bi ti awayî nayê qebûlkirin.
Serok Barzanî di dawiya axaftinên xwe de spasiya berxwedana şêniyên wan deveran kir û daxwaz ji wan kir moralên xwe bihêz bikin û hêviya wan hebe jiber ku li hember zordarî, sitem û zilimê wan bi tenê nahêle.
