Parlamenterekî Îranê li ser referandumê ji Barzanî re name şand
Hişmetullah Felahetpîşe ku di aprlamentoya Îranê de nûnerê bajarên Îslam Ava ya Rojava û Dalaho yên ser bi parêzgeha Kirmaşan a Rojhilatê Kurdistanê ve ye, di nameya xwe ya bo Barzanî de dibêje: “Şikesta DAIŞê li Iraqê dawiyê wê pîlanê nîne, ku hinek ji welatên erebî û Îsraîlê bo têkdana rewşa ewlehiya Iraqê û welatên din danîne.”
Felahetpîşe biryardan li ser sazdana referanduma serxwebûna Başûrê Kurdistanê bi pîlana Îsraîl û welatên ereb ên paşketî û şerxwazên Amerîkayê bi nav dike û îdia dike, ku ew alî naxwazin ewlehî li devera îslamî hebe.
Ew parlamenterê Kurd ê ser bi hikûmeta Komara Îslamiya Îranê herwiha dibêje, bangewaza serxwebûnê li welatekî ku tûşî krîzê bibe, tenê ne ewlehiyê û şerê navxweyî bi xwe re tîne.
Hişmetullah Felahetpîşe di beşeke din a vê nameya xwe de tekez dike, ku ji ber biryara referanduma serxwebûna Başûrê Kurdistanê, bêna xwînê tê û daxwaz li Serokê Herêma Kurdistanê dike, ku wê referandumê paş bixe.
Felahetpîşe destnîşan dike, ku hêj Herêma Kurdistanê bi temamî ji pîlana DAIŞê rizgar nebûye û dibêje, ew welatê birîndar û zolmlêkirî, piştî wan hemû aloziyan pêwîstî bi aramiyê heye û daxwaz ji Barzanî dike, ku têkildarî referanduma serxwebûna Herêma Kurdistanê,bi hestyarî û xweparêziyeke zêdetir tevbigere.
Di dawiya nameya xwe de, ew parlamenterê Kurd ê ser bi hikûmeta Îranê ve daxwaza bihêzkirina hikûmeta navendî ya Iraqê û mana kurdan di çarçoveya welatên Iraq, Îran, Sûriye û Tirkiyeyê dike.
Wî parlamenterî herwiha sivikatî bi milletê Kurd û maf û daxwaziyê wê kiriye û dibêje: “Ez daxwaz dikim, ku werin bila em li Iraqê û Îran û Sûriye û Tirkiyeyê, zêdebarî parastina ruhê niştimanperweriya xwe, her weke dareke qahîm weke perjîneke (dîwareke) bihêz a cografiya welatên xwe bimînin û weke şaxe û bergên darê nebin, ku bi her bayeke sivik bihejin û biverin an weke neteweke qerec a bê mal û hal bin, ku ji hev belavbûna wan armanca hertimî ya dijminan e.”
Rudaw
