YPGê ragihan ku, di êrîşên Artêşa Tirkiyê bo ser Efrînê û Girê Spî de 5 sivîlan cane xwe ji dest dane.

Navenda Çapemeniya YPGê îro di daxuyaniyeke nivîskî de diyar kir, ku di encama êrîşên Artêşa Tirkiyê de hin hêzên Dijbereya Sûriyê li ser gundên Efrîn, Şehba û Girê Spî de 5 kesên sivîl canê xwe ji dest dan.

YPGê di daxuyaniya xwe destnîşan kir, ku di encama êrîşên Artêşa Tirkiyê û Artêşa Azad a Sûriyê bo ser gundên Efrînê û herêma Şehbayê de, 3 welatiyên sivîl cane xwe ji dest dan û 8 kes jî birîndar bûn.

Herwiha YPGê aşkere kir, dema ku hin ciwanên Girê Spî xwestin derbasî Bakurê Kurdistanê bibin, rastî gulebarana leşkerên Tirkiyê hatin û di encamê de 2 kes hatin kuştin û 4 kes jî birîndar bûn.

Artêşa Tirkiyê û hêzên Dijbereya Sûriyê demek e ku gundên Efrînê û Şehbayê topbaran dikin.

Herwiha Tirkiyê ragihandiye, ku leşkerên xwe amade dike, da ku êrişeke berfireh bo ser binke û baregehên YPGê li herêma Efrînê ya Rojavayê Kurdistanê pêk bîne.