Sibe her sê partiyên YNK, Yekgirtû û Komel bêyî PDKê û Goranê li Hewlêrê civînekê di asta bilind de lidar dixin. Tê gotin, ew her sê partî di asta kesên yekem de dicivin.

Li gor agahiyên Rûdawê, sibe sêşem 13ê Cotmehê berpirsên yekem û sereke yên her sê partiyên Yekîtiya Niştîmaniya Kurdistanê (YNK), Yekgirtûya Îslamiya Kurdistanê û Komela Îslamiya Kurdistanê dê li bajarê Hewlêrê bicivin.

Li gor agahiyan, ew her sê alî bo nirxandina rewşa siyasî ya Herêma Kurdistanê piştî aloziyên navbera Partiya Demokrata Kurdistanê (PDK) û Tevgera Gorranê û herwiha xwepêşandan û tundûtîjiyên çend rojên borî dicivin.

Çavkaniyekî agahdar di vê bareyê de ji Rûdawê re ragihand: “Sibe Alîkarê yekem ê Sekreterê Giştî yên YNK Kosret Resûl Elî, Sekreterê Giştî yê Yekgirtûya Îslamiya Kurdistanê Mihemed Ferec û Emîrê Komela Îslamiya Kurdistanê Elî Bapîr li Hewlêrê dicivin.”

Derbarê beşdarînebûna PDKê û Gorranê di vê civînê de jî, çavkaniyê Rûdawê got: “Arîşe û alozî zêdetir di navbera PDKê û Gorranê de ye. Ew her du partî aliyên arîşeyê ne. Ji ber wê jî kesê yekem ên her sê partiyên YNK, Yekgirtû û Komel dê li mala Kosret resûl dicivin.”

Duh 11ê Cotmehê Tevgera Gorranê daxuyaniyek belav kir û têde ragihand, ku PDKê bi rêya nûnerên xwe di parlamento û hikûmetê de, Serokê Parlamentoya Kurdistanl Yûsif Mihemed û wezîrên ser bi Gorranê ve agahdar kirine ku ji 12ê Cotmehê ve neçin ser karên xwe û ji Hewlêr derkevin.

Herwiha îro 12ê Cotmehê hêzên ewlehiyê yên Hewlêrê li xala kontrolê ya Pirdê ya di navbera Kerkûk û Hewlêrê de rê nedna ku Serokê Parlamentoya Kurdistanê Yûsif Mihemed û şanda pê re derbasî nav Hewlêrê bibin û bi neçarî vegeriyan Silêmaniyê.

Rudaw