Fermandarê Pêşmerge Hemîd Efendî radigehîne ku, terorîstên DAIŞê ji nav wê rêxistinê direvin û xwe radestî Hêzên Pêşmerge dikin. Ji aliyê din ve malbatên Ereb jî ji DAIŞ’ê direvin û xwe radestê Pêşmerge dikin.

Berpirsên Pêşmerge li Eniya Başîk, Hemîd Efendî, di daxuyaniyekê de ji KDP.info re ragehand ku, destpêkê DAIŞ bi hêzeke mezin êrîş dikirin û gelek xelkê Ereb tevlî wab dibûn, lê piştî ku derket niyaza wê rêxistina terrorist xirab e, niha xelik ji nav wan direvin.

Hemîd Efendî diyar kir jî ku, êdî karîn û şiyanên DAIŞê yekcarî nemane û ji tevger ketiye.

Navborî eşkere kir ku, di demên dawiyê de gelek çekdar ji nav rêxistina terrorist a DAIŞê revî ne û xwe radestî pêşmerge kirine.

”Xelk jî ji DAIŞ’ê direvin”

Ji aliyê din ve Cîgirê Fermandarê Eniya Mexmûr-Guwêr Dr Aras Heso Mîrxan jî ragehand ku hejmara çekdarên DAIŞ’ê kêm dibin û gelek ji wan jî têne kuştin, ji lewra rêxistin xelkê bi zorê dike çakdar.

Mîrxan ragehand ku ji ber vê zextê xelk ji destê rêxistinê direve û xwe dispêre axên bin parastina Hêzên Pêşmerge.

Mîrxan herwiha da zanîn ku tenê di nava vê hefteya dawî de li nav sînorên eniya wan, 40 kes hatine û xwe radestê Pêşmergeyan kirine.

Basnews