Serokê Dêrên Kildaniyên Katolîk ên Cîhanê Patriyark Mar Luis Sako daxuyand ku rêberên Partiya Demokrata Kurdistanê di hemû serdemên xwe de rêzek teybet dane Mesîhiyan û ew weka bira dîtine. Ji ber vê jî di sengerên şoreşê de xwîna Pêşmergeyên Kurd û Mesihiyan bihev re rijyaye.

Sekreterê polîtbîroya Partiya Demokrata Kurdistanê (PDK) Fazil Mîranî îro li Selahadîn pêşwaziya Serokê Dêrên Kildaniyên Katolîk ên Cîhanê Patriyark Mar Luis Sako û metranên Amerîka, Kanada, Îran û Hewlêrê kir.

Li gor daxuyaniya malpera fermî ya PDK’ê kdp.info di hevdîtinê de Mîranî behsa rewşa îro ya Iraqê, navçeyê û Kurdistanê kir. Derbarê pêkvejiyana Kurdan û gelên Hristiyan jî diyar kir ku ji kûrahiya dîrokê ve heta niha van gelan bihev re bi biratî û yekrêzî, di nava aştiyê de jiyane.

Mîranî got; ”Em we weke mêvan nabînin. Jiber ku em bi hevbeş hemwelatiyê vê herêmê ne. Serok Barzanî jî çi li Kurdistanê be, çi jî li Iraqê, giringiyê dide biratiyê û piştgirî dide Mesîhiyan bo sepandina mafên wan.”

Ji aliyê xwe ve Serokê Dêrên Kildaniyên Katolîk ên Cîhanê Patriyark Mar Luis Sako jî bi navê xwe û şanda xwe spasiya xwe ragehand û diyar kir ku Mesîhî li Herêma Kurdistanê pir bi asûdeyî û aramî dijîn. Patriyark Mar Luis Sako daxuyand ku ti ferq û cûdahî di navbera Kurd û Mesihiyan de nayê kirin û got ku Mesihiyên li Iraqê dijî ji cihê xwe direvin. Piraniya wan jî hatine Kurdistanê û li vir dimînin.