Serokwezîrê Birîtanya David Cameron derbarê xeniqîna zarokê kurd Alan Kurdî yê 3 salî de bertek nîşan da û ragihand, wêneyê Alan bandorek mezin li wî kiriye.

Serokwezîrê Birîtanya David Cameron li ser xeniqîna Alan Kurdî yê 3 salî yê ji bajarê Kobanî ku di deryaya Spî de xeniqî û cenazeyê wî li qeraxa bajarê Bodrum ê Tirkiyeyê hat dîtin, hate deng û bertek nîşan da.

David Cameron di daxuyaniyekê de ragihand, ku wêneyê Alan bandorek pir mezin li wî kiriye û got: “Ji ber ku ez jî bav im, ew wêne gellek bandor li min kir.”

Cameron herwiha soz da û got: “Birîtanya dê berpirsariya exlaqî li hember kirîza koçberan bigre ser xwe.”

Cameron tekez jî kir: “Lê belê wergirtina koçberên din nabe alîkar bo çareserkirina arîşeyan.”

Ew helwesta Serokwezîrê Birîtanya David Cameron piştî helwestên Serokwezîrê Fransa Manuel Valls, Serokwezîrê Îtalya Matteo Renzi, Wezîra Parastina Îtalya Roberta Pinotti û Serokê Herêma Kurdistanê Mesûd Barzanî hat ku li ser xeniqîna Alan û bira û dayika wî daxuyanî dabûn û xemgîniya xwe anîbûn ziman.

Alan Kurdî yê 3 salî, birayê wî Xalib ê 5 salî û dayika wan Rihan a 28 salî ku xelkê Kobanî yê Rojavayê Kurdistanê bûn, roja 2ê Îlonê di deryaya Spî de xeniqîn û cenazeyên wan li qeraxa bajarê Bodrumê li Tirkiyeyê hatin dîtin.

Îro 4ê Îlonê termê Alan û bira û dayika wî ji Tirkiyeyê ve birin Kobanî û li wir bi axê spartin.