Alîkarê Serokê Herêma Kurdistanê Kosret Resûl Elî ragihand, êdî metirsiya DAIŞê li ser Kerkûkê nemaye lê “metirsiya malwêraniya kurd hîn maye!” Elî bang li partiyên siyasî kir, mîna Pêşmerge bibin yek.

Hêzên Pêşmerge îro ji bo standina gundên girêdayî bajarokên Daqûq û Xurmatû, dest bi operasyoneke berfireh li dijî DAIŞê kirin.

Di wê operasyonê de Alîkarê Serokê Herêma Kurdistanê Kosret Resûl Elî jî beşdar bûye û niha li eniya şer e.

Kosret Resûl Elî, ku di heman demê de alîkarê Fermandeyê Giştî yê Hêzên Çekdar e jî, ji Rûdawê re got, êdî metirsiya DAIŞê li ser Kerkûkê nemaye.

Elî li ser kirîza serokatiyê û lihevnekirina partiyên siyasî li ser wê mijarê jî axivî û got, lê metirsiya malwêraniya kurd hîn maye ji ber wê jî ez ji partiyên siyasî dixwazim mîna Pêşmerge bibin yek û aramiya Kurdistanê biparêzin.

Ji aliyekî din, civîna pêncemîn a partiyên şirîkên hikûmetê li ser kirîza serokatiyê bîstekê beriya niha li bajarê Hewlêrê dest pê kir.

Rudaw