Hevpeymaniya Dewleta Qanûnê li Parlamentoya Iraqê ku ji aliyê serokwezîrê berê yê Iraqê Nûrî Malikî ve tê birêvebirin, li dijî gotinên Serokê Herêma Kurdistanê Mesûd Barzanî yên li ser Şingalê nerazîbûn nîşan da.

Serokê Herêma Kurdistanê Mesûd Barzanî roja 3ê Tebaxa îsal û bi helkefta yekemîn salvegera jenosîda Şingalê, beşdarî merasima bibîranîna qurbaniyên jenosîda Şingalê bibû.

Barzanî di wê merasimê de gotarek pêşkêş kiribû û gotibû, me Şingal xist ser Herêma Kurdistanê û êdî em Şingalê teslîmî ti kesî nakin.

Ew gotinên Barzanî rastî nerazîbûna rayedar û parlamenterên nêzîkî serokwezîrê berê yê Iraqê û alîkarê niha yê Serokomarê Iraqê, Nûrî Malikî hat.

Parlamenterê Iraqê û yek ji rayedarên Dewleta Qanûnê bi navê Mihemed Seyhûd li ser gotinên Barzanî gotiye, devera Şingalê girêdayî hikûmeta navendî ye çimkî ew der beşek ji “herêmên kêşedar” e û ti kes nikare wê deverê bixe ser Herêma Kurdistanê.

Mihemed Seyhûd her wiha diyar kiriye ku di navbera Hewlêr û Bexdayê de ti rêkeftinek tine ku Şingal bibe beşek ji Herêma Kurdistanê.

Serokê fraksiyona Kefaatê ya Parlamentoya Iraqê ku beşek ji hevpeymaniya Dewleta Qanûnê ye, Heysem Cibûrî tûjtir axiviye û gotiye, ew gotinên Barzanî yên li ser Şingalê “Nazî”yên almanî tîne bîra mirov.

Li gorî wî peyayê Malikî, divê Barzanî ji ber wan gotinên xwe were darizandin!

Rudaw