هونەرمەندی شێوەكار هەوار مەزهەر بۆ گوڵان:بازاڕی هونەر لە كوردستان هەیە و لە گەشەكردندایە
هەوار مەزهەر هونەرمەندێکی شێوەکاری کوردە، کە بە بەرهەمە هونەرییەکانی و بەشدارییە بەردەوامەکانی لە بوارەکانی نیگارکێشان و چالاکییە هونەرییەکاندا ناسراوە. ئەو لە ماوەی چالاکییە هونەرییەکەیدا چەندین پێشانگای تاکەکەسی بەڕێوە بردووە.
لەدایکبووی شاری هەولێرە و پزیشک و شێوەکارە. دوای ساڵانێک تەرخانکردنی کات و تواناکانی بۆ بواری پزیشکی، لە ساڵی ٢٠١٦دا گەڕایەوە سەر شێوەکاری و لە ڕێگەی خۆپێگەیاندن و تێڕامانەوە، پەرەی بە بەهرە و تواناکانی هونەریی خۆی دا.
سروشت، کەلتوور و خەڵکی کوردستان سەرچاوەی ئیلهامبەخشن بۆ کارەکانی؛ کارەکانی ڕێز لە یادەوەری، شوێن و هەستی ئینتیما دەگرن. ئەو لە ڕێگەی بەکارهێنانی ڕووناکی، تەم و ڕەنگەوە، هۆنراوەیەکی شێوەکاری دەخولقێنێت کە ڕێز لە ژیانی ڕۆژانە دەگرێت و جوانیی کەلەپووری کوردی دەپارێزێت.
یەکێک لە نوێترین چالاکییەکانی، پێشانگای تاکەکەسیی «یادەوەرییەکانی تیشک و تەم» بوو، کە لە مانگی حوزەیرانی ساڵی ٢٠٢٦ لە شاری هەولێر بەڕێوە چوو. لەم پێشانگایەدا کۆمەڵێک لە بەرهەمە نوێ و سەرنجڕاکێشەکانی خۆی پیشان دا و بە شێوەیەکی تایبەت، هەست و بینینی هونەریی خۆی لە ڕێگەی ڕەنگ، تیشک و تەمەوە وێنا کرد.
بە مەبەستی ناساندنی زیاتر بە ژیانی هونەری، ئەزموون و دیدگای ئەم خانمە هونەرمەندە، هەروەها بۆ زانینی بیرۆکە و سەرچاوەکانی ئیلهام لە بەرهەمەکانی، لەم دەرفەتەدا چەند پرسیارێکمان ئاراستەی خاتوو هەوار مەزهەر کرد.
*خۆت لە كام قوتابخانەی هونەری شێوەكاری نزیكتر دەبینیت؟
-شێوازی كارەكانم زیاتر لە چوارچێوەی ڕیالیزمدایە، بەڵام لەو بەشانەی تابلۆكە كە خاڵی سەرنج نین، زۆرجار شێوازی فڵچەلێدانی ئیمپرێسیۆنیستی بەكار دەهێنم. بەم شێوەیە سەرنجی بینەر بەرەو بەشی سەرەكی تابلۆكە ڕادەكێشم.
*كارە هونەرییەكانت لە سرووشت نزیكن. سرووشت بۆ تۆ وەك هونەرمەند چییە، ئایا سرووشتی كوردستان، بە شاخ و دۆڵ و ڕەنگە جیاوازەكانییەوە سەرچاوەی وەرگرتنی بیرۆكە و ئیلهامە بۆ بەرهەمە هونەرییەكانت؟
-سرووشت بۆ من سەرچاوەی سەرەكیی ئیلهامە. سرووشتی كوردستان، بە شاخ و دۆڵ و ڕەنگ و ڕووناكییە جیاوازەكانییەوە، بەردەوام بیرۆكە و هەستێكی نوێم پێ دەبەخشێت بۆ كارە هونەرییەكانم.
*تا چەند هونەری وێنەكێشان دەتوانێت كاریگەریی لەسەر كۆمەڵگە دابنێت و شێوازی بینینی خەڵك بۆ كێشە كۆمەڵایەتییەكان، ژینگە و ناسنامە بگۆڕێت، ئایا پێت وایە هونەرمەند لەگەڵ بەرپرسیارێتیی هونەری، بەرپرسیارێتیی كۆمەڵایەتیشی هەیە؟
-پێم وایە هونەر زمانێكی بەهێزە و دەتوانێت بێ وشە پەیام بگەیەنێت و سەرنجی خەڵك بۆ بابەتێك ڕابكێشێت، هونەرمەند بە هەڵبژاردنی بابەتەكانی خۆی، دەتوانێت هۆشیاری لەبارەی ژینگە، ناسنامە و كێشە كۆمەڵایەتییەكان دروست بكات، بۆیە پێم وایە هونەرمەند بەرپرسیارێتیی كۆمەڵایەتیشی هەیە، بەڵام بە شێوازی خۆی و لە ڕێگەی هونەرەكەیەوە.
*بۆچوونی كۆمەڵگەی كوردستان لەبارەی هونەری شێوەكاری و وێنەكێشان لە ئەمڕۆدا چۆن دەبینیت، ئایا پێت وایە ئەو شوێنە و گرنگییەی شایستەیەتی، لە كۆمەڵگەدا هەیە؟
-پێم وایە لەم ساڵانەی دواییدا سەرنج و پشتیوانی بۆ هونەر لە كۆمەڵگەی كوردستاندا زیاتر بووە و خەڵك زیاتر گرنگی بە كاری هونەری دەدەن، ئەمەش شتێكی دڵخۆشكەرە، بەڵام پێم وایە هێشتا هونەر پێویستی بە پشتیوانی و بوار و دەرفەتی زیاتر هەیە، بۆ ئەوەی بتوانێت ئەو شوێن و گرنگییەی شایستەیەتی لە كۆمەڵگەدا بەدەست بهێنێت.
*لە ماوەی ژیانی هونەریی خۆتدا تا ئێستا چەند تابلۆ یان بەرهەمی هونەریت فرۆشتووە و، فرۆشتنی بەرهەمێكی هونەری بۆ تۆ تەنیا سەركەوتنێكی ماددییە، یان بەڵگەیەكە بۆ دداننان بە نرخ و بەهای ئەزموونە هونەرییەكەتدا؟
-بە دڵنیاییەوە هەندێك لە تابلۆكانم بە نرخێكی بەرز فرۆشراون، بەڵام حەز دەكەم وردەكاریی نرخەكان لە نێوان خۆم و كڕیارەكانمدا بمێنێتەوە. بۆ من بەهای تابلۆ تەنیا بە نرخەكەی ناپێورێت؛ هەر كارێك چیرۆك و تایبەتمەندییەكی خۆی هەیە، بابەت، قەبارە، وردەكاری، كات و هەوڵ و ئەزموونی هونەرمەند هەموویان لە بەهای كارەكەدا ڕۆڵیان هەیە.
*بازاڕی هونەری وێنەكێشان و هونەری پلاستیكی لە كوردستان چۆن هەڵدەسەنگێنیت، ئەی گرنگترین ئەو بەربەستانە چین كە هونەرمەندان لە گەیشتن بە بینەر، كۆكەرەوەكانی بەرهەمە هونەرییەكان و ئەو كەسانەی حەزیان بە كڕینی تابلۆ و بەرهەمی هونەری هەیە، ڕووبەڕووی دەبنەوە؟
-پێم وایە بازاڕی هونەر لە كوردستان هەیە و لە گەشەكردندایە، بەڵام یەكێك لە بەربەستە سەرەكییەكان نەبوونی پەیوەندیی بەهێز و ڕێكخراوە لە نێوان هونەرمەند، گەلەری، كۆكەرەوە و كڕیاردا. زۆرجار هونەرمەند كارێكی باشی هەیە، بەڵام گەیشتن بە بینەر و كڕیاری گونجاو ئاسان نییە. پێویستە پێشانگا، گەلەری و پلاتفۆرمی زیاتر هەبن كە بتوانن ئەم پەیوەندییە دروست بكەن.
*ئەگەر داوات لێ بكرێت تەنیا یەكێك لە بەرهەمەكانت هەڵبژێریت كە كەسایەتی، ئەزموونی هونەری و پەیوەندیت بە سرووشت باشترین شێوە دەرببڕێت، كام تابلۆ هەڵدەبژێریت، ئەی چیرۆك یان پەیامی پشت ئەو بەرهەمە چییە؟
-ئەگەر یەك تابلۆ هەڵبژێرم، «شوانە لە ڕێگادا» هەڵدەبژێرم، چونكە یەكێكە لە نزیكترین كارەكانم لە دڵمەوە. لەم تابلۆیەدا هەوڵم داوە لە ڕێگەی شوانێكی سادە و سرووشتی تەمگرتووی كوردستانەوە، شكۆ و پیرۆزیی كار و ماندووبوونی مرۆڤی سادە پیشان بدەم.
بۆ من ئەم كەسانە بەشێكن لە ڕۆح و یادەوەریی خاكەكەمان، و ژیان و كاری ڕۆژانەیان جوانی و بەهایەكی تایبەتی هەیە كە شایستەی ئەوەیە لە هونەردا بپارێزرێت.
