لە فەرهەنگی سیاسیی هاوچەرخدا، «بێلایەنی» زۆرجار وەك بژاردەیەكی ژیرانە بۆ قەوارە بچووكەكان دەردەكەوێت، بەڵام لە واقیعی جیۆپۆلەتیكی هەرێمی كوردستاندا، ئەم چەمكە بەرەو كاڵبوونەوە و نەمانی یەكجاری دەچێت. ئەگەرچی هەرێمی كوردستان هەمیشە هەوڵی داوە هاوسەنگییەك لە نێوان هێزە دژبەرەكاندا ڕابگرێت، بەڵام ڕووداوەكانی دوای ٧ی ئۆكتۆبەر و بەتایبەتی پێكدادانە ڕاستەوخۆكانی ئەم دواییەی نێوان ئەمریكا، ئیسرائیل و ئێران، چەمكی بێلایەنییان بۆ هەرێم «سفر» كردووەتەوە. ئێمە خاوەن ئایدیۆلۆژیا و تێڕوانینی سیاسیی تایبەت بە خۆمانین. دۆستی ستراتیژیی ویلایەتە یەكگرتووەكانی ئەمریكاین و لە هەمان كاتدا نەیارێتیی دراوسێكانمان (ئێران و توركیا) وەك بژاردە هەڵنەبژاردووە، بەڵام كاتێك ناوچەكە دەكوڵێت، ئیتر بێلایەنی دەبێتە وەهمێكی سیاسی كە ناتوانێت پارێزبەندیی ڕاستەوخۆ بۆ هیچ لایەك دابین بكات.

هێزی پێشمەرگەی كوردستان ئێستا لە بەردەم هەڕەشەیەكی جددیی سیاسی و سەربازیدایە، بەتایبەت لە لایەن حەشدی شەعبییەوە كە وەك نەیار و فاكتەری تێكدەر سەیری دەكەن. ئەوان پێیانوایە پێشمەرگە بەشێك نییە لە سیستەمی بەرگریی عێراق، هەربۆیە پەنا بۆ بڕینی مووچە و بوودجەكەی دەبەن. بەڵام گرفتی هەرە گەورەی ناوخۆیی ئێمە درزی نێوان یەكێتی و پارتییە لە یەكنەخستنی ئەم هێزەدا. دوژمنانی كورد هەمیشە ئەم درزەیان بۆ بەرژەوەندیی خۆیان گەورە كردووەتەوە.

بۆ ئەوەی پێشمەرگە ببێتە هێزێكی پارێزەری ڕاستەقینە، دەبێت لە چەمكی حزبیبوون بێتە دەرەوە و ئینتیمای بۆ «نیشتمان، نەتەوە و دەوڵەت» بێت. پێویستە ئەم هێزە لە گەندەڵی پاك بكرێتەوە، ڕاهێنانی مۆدێرنی پێ بكرێت و باشترین چەك و كەلوپەلی سەربازیی بۆ دابین بكرێت.

یەكێك لە گەورەترین لاوازییەكانی حكومەتی هەرێم، مامەڵەكردنی كاردانەوەییە لەگەڵ ڕووداوەكاندا. داخستنی گەرووی هورمز ئەگەرێكی مەحتەمەلە و دەبێت هەرێم بەدیلی بۆ ئەم دۆخە هەبێت. نەیارەكانی ئێمە (وەك توركیا، یان عێراق) دەتوانن لە هەر كاتێكدا دەروازەكانمان لێ دابخەن، كەواتە بەدیلی خۆبژێوی چییە؟ لە وڵاتێكی وەك قەتەر، یان ئیمارات یەدەگی یەكجار زۆری سووتەمەنی و خۆراك هەیە بۆ چەندین مانگی كاتی جەنگ، بەڵام لە هەرێمی كوردستان، لە دووەم ڕۆژی شەڕدا، نرخی بوتڵێكی غاز چەند هێندە زیاد دەكات. ئەمە نیشانەی كەمتەرخەمیی حكومەت و چاوچنۆكیی سەرمایەدارانە.

حكومەت دەبێت بەرپرس بێت لە دابینكردنی «ئاسایشی خۆراك و ئاسایشی غاز» بۆ لانیكەم شەش مانگ. ناكرێت ژیانی خەڵك بدرێتە دەست كۆمپانیا ئەهلییەكان كە تەنیا بیر لە قازانجی خۆیان دەكەنەوە. حكومەت دەبێت لە كاتی قەیراندا ئیدارەی ژیان بدات، نەك تەنیا لە كاتی ئاساییدا مووچە دابەش بكات. گوزەرانی خەڵك و ئارامیی بازاڕ فاكتەری سەرەكین بۆ مانەوەی هەرێم لە ناو ئەم هەڵچوونە سیاسییەی ناوچەكەدا.

لە ناو ئەم هاوكێشە ئاڵۆزەدا، هەرێمی كوردستان لەبەردەم مەترسی و ئالنگاریی گەورەدایە. حكومەتی هەرێم دەبێت بەرپەرسیارانەتر مامەڵە بكات، گوێ لە خەڵكی شارەزا بگرێت و ستراتیژییەكی نوێ بۆ مانەوە دابڕێژێت. كاتێك ئیسرائیل و ئەمریكا دەیانەوێت نەخشەی سیاسیی ناوچەكە بگۆڕن، كورد دەبێت ئامادە بێت بۆ ئەوەی نەبێتە قوربانی و وەك كارەكتەرێكی سەرەكی لە هاوكێشەكەدا بمێنێتەوە. داهاتوو بۆ ئەو لایەنەیە كە خاوەنی یەكگرتوویی ناوخۆیی، ئابوورییەكی خۆبژێو و هێزێكی نیزامیی نیشتمانییە. هەر جۆرە كەمتەرخەمییەك لەم بوارانەدا، یانی بانگهێشتكردنی كارەسات بۆ سەر خاكی كوردستان. ئێمە پێویستمان بە گۆڕانكاریی ڕیشەیی هەیە لە شێوازی بیركردنەوە و دەوڵەتداری، چونكە زەمانەتی مانەوە تەنیا لە هێزی ناوخۆییدایە.