یەكێك لە تەوەرە سەرەكییەكانی پاراستنی قەوارەی هەرێم، هێزی پێشمەرگەیە. مامەڵەكردن لەگەڵ ئەم هێزە نیشتمانییەدا پێویستی بە گۆڕانكارییەكی ستراتیژیی قووڵ هەیە. هەر گۆڕانكارییەك لەم بوارەدا، هەرێم ڕووبەڕووی كۆمەڵێك ئالنگاریی گەورە دەكاتەوە، كە پێویستی بە پشتیوانییەكی بێ ئەملا و ئەولای نێودەوڵەتی هەیە، بەتایبەتی لەلایەن ئەمریكا و وڵاتانی ڕۆژئاواوە.

گەورەترین و مەترسیدارترین كێشەی هەرێمی كوردستان لەم ساتەوەختەدا، نەبوونی «ستراتیژییەكی نیشتمانیی یەكگرتوو»ە. جێگەی داخە كە لایەنە سیاسییەكانی كوردستان نەیانتوانیوە لەسەر نەخشەیەكی بەرگریی هاوبەش ڕێك بكەون، كە پەیوەندی بە مامەڵەكردن لەگەڵ بەغدا، تاران و ئەنقەرەوە هەبێت. ئەم پەرتەوازەییە ناوخۆییە خاڵە لاوازە ستراتیژییەكەی ئێمەیە. ڕووداوەكانی ئەم دواییەی پەیوەست بە مامەڵەكردن لەگەڵ حكومەتی فیدڕاڵیی عێراق، سەلماندیان كە تەنانەت لە دۆخە هەرە دژوارەكانیشدا، هێشتا ناتوانین وەك یەك یەكەی سیاسی و خاوەن یەك دیدگا بیر بكەینەوە.

یەكێك لە پێشنیارە هەرە گرنگەكان كە ساڵانێكە جەختی لەسەر دەكرێتەوە، پرسی «ئاسایشی خۆراك» و دروستكردنی كۆگای ستراتیژییە. هەرێمی كوردستان پێویستی بەوە هەیە كە لانیكەم بۆ ماوەی شەش مانگ كۆگایەكی گەورەی خۆراك و سووتەمەنی لە ناو جەرگەی چیاكاندا هەبێت، تا لە كاتی گەمارۆ، یان جەنگی چاوەڕواننەكراودا بەرگە بگرێت. لێرەدا دەكرێت سوود لە ئەزموونی وڵاتانی دراوسێ وەربگیرێت، بۆ نموونە لە ئێراندا، سوپای پاسداران خاوەنی كۆمەڵێك كۆمپانیای گەورەی خۆراكە كە لە كاتی قەیراندا بازاڕ لە شڵەژان دەپارێزن. هەرێمی كوردستان پێویستی بەوەیە حكومەت خۆی ببێتە خاوەنی كۆمپانیای گەورە كە لە كاتی پێویستدا كاڵا دابین بكەن تا ڕێگری لە یاریكردن بە نرخ و دروستبوونی ترسی جەماوەری بكرێت. پشتبەستن بە بەرهەمی ناوخۆیی و كۆكردنەوەی سەرچاوەكان، یەكێكە لە پایە سەرەكییەكانی پاراستنی سەربەخۆیی سیاسی.

سەبارەت بە داوای پاراستنی نێودەوڵەتی، دەبێت ئاماژە بەوە بكرێت كە هەرێمی كوردستان لە ڕووی یاساییەوە ئەو سیفەتە دەوڵەتییەی نییە كە بتوانێت ڕاستەوخۆ داوایەكی وا ئاراستەی نەتەوە یەكگرتووەكان بكات. كارایی نەتەوە یەكگرتووەكان گرێدراوی بەرژەوەندیی زلهێزەكانە. مەگەر مەسەلەكە بگاتە ئاستی مەترسیی «جینۆساید»، ئەو كاتە ڕەنگە جیهان بیر لە چەترێكی پارێزگاری بكاتەوە. بۆیە، لە جیاتی چاوەڕوانی بۆ موعجیزەی نێودەوڵەتی، پێویستە هەرێم لە ناوخۆدا خۆی بینا بكاتەوە، ڕێگری بكات لە بەهەدەردانی سەروەت و سامانی گشتی و هەوڵ بدات جارێكی دی مافی هەناردەكردنی سەربەخۆی نەوت بەدەست بهێنێتەوە، تا بتوانێت سوود لەم قۆناغە وەربگرێت.

تاوەكو ئێستا، خۆشبەختانە ترس و دڵەڕاوكێیەكی قووڵ لە ناو خەڵكدا نییە و متمانەیەك بە ئایندە بەدی دەكرێت. بەڵام نیگەرانیی ڕاستەقینە لەوەدایە كە ئەم شەڕانە چۆن كۆتاییان دێت، چونكە ئەنجامی كۆتایی جەنگەكان ڕەنگدانەوەی ڕاستەوخۆی بەسەر ئێمەوە دەبێت. بۆیە ئەركی حكومەت و سەركردایەتیی سیاسیی هەرێمی كوردستان لەم ساتەدا ئەوەیە كە زۆر بە وردی و جوانی ڕووداوەكان بخوێننەوە. نابێت هەنگاوی هەڵەشە بنێن، لە هەمان كاتیشدا نابێت لە ڕووداوەكان بترسن. پێویستە دیدێكی یەكگرتووانە هەبێت كە تێیدا كێشە ناوخۆییەكان نەبنە ڕێگر لەبەردەم پاراستنی بەرژەوەندییە باڵاكان.

هاوپەیمانیی سەربازیی نوێ لەم كاتەدا لەوانەیە بژاردەیەكی بەردەست نەبێت، بەڵام ئەگەر ڕووداوەكان بەرەو خراپتر بڕۆن، ڕەنگە ئەگەرێكی لەو جۆرە بێتە پێشەوە. كورتەی قسە ئەوەیە: مانەوەی هەرێمی كوردستان لەم گێژاوەدا پەیوەستە بەوەی كە تا چەند دەتوانین «ناوخۆمان» بەهێز بكەین، تا چەند دەتوانین واز لە ململانێی حزبی بهێنین بۆ خاتری ستراتیژییەكی نەتەوەیی، تا چەند دەتوانین وەك گەلێك كە لە مێژووەوە وانەی وەرگرتووە، بە هۆشیارییەوە مامەڵە لەگەڵ داهاتوودا بكەین. هەرێمی كوردستان پێویستی بە ژێرخانێكی ئابووریی بەهێز و سوپایەكی یەكگرتوو و دیپلۆماسییەكی زیرەك هەیە، تا لەم تەمومژە تاریكەی ناوچەكە بە سەلامەتی دەربچێت. هەر جۆرە پشتگوێخستنێكی یەكڕیزیی ناوخۆیی، بانگهێشتكردنی مەترسییەكانە بۆ ناو ماڵی خۆمان. پەیامی سەرەكی ئەوەیە: «خۆت بەهێز بكە تا جیهان ناچار بێت پشتیوانیت بكات».