لە نێوان هەموو هێماکانی بوون، هیچ شتێک وەک زمانی دایک بەهێز نییە, زمان ئەو ئاوازەیە کە منداڵ یەکەمجار لە گوێی دەچێت، ئەو وشانەن کە یەکەم هەنگاوی بیرکردنەوەیان پێ دەستپێدەکات، و ئەو ڕووناکییەیە کە بەهۆیەوە جیهان دەناسێت, زمانی دایک تەنها قسەکردن نییە؛ ڕووحی نەتەوەیە، بیر و هەست و یادەوەرییەکانیەتی.

بۆ نەتەوەی کورد، زمانی کوردی مێژوویەکی درێژ و پڕ لە خەباتی لەگەڵ خۆی هەڵگرتووە, لە هۆنراوه‌ و چیرۆکە کۆنەکانەوە تا ئەدەبی نوێ، لە هۆنراوەکانی مەزنانی وەک ئەحمەدی خانی و نالیەوە تا دەنگی شاعیرانی سەردەمی نوێ، هەمیشە زمانی کوردی بووە کە خەڵکی بەیەکەوە گرێداوە و شوناسیان پاراستووە, ئەو زمانە لە سەردەمانێکدا ڕووبەڕووی قەدەغە و گوشار بوو، بەڵام نەکوژرا؛ چونکە لە دڵی خەڵکدا ژیا.

زمان کاتێک لاواز دەبێت کە بەکار نەهێندرێت, ئەگەر نەخوێنرێت و پێی نەنووسرێت، ئەگەر وشەکانمان لە بیر بچن، بەشێک لە ناسنامە و مێژوومان لەدەست دەدەین.
بەڵام کاتێک بە ڕێز و بەرپرسیارێتیه‌وه‌ زمانی دایک بەکاربهێنین، ئەوا هەنگاوێک بۆ بەهێزکردنی بوونی خۆمان هەڵدەگرین. پاراستنی زمان، پاراستنی فەرهەنگ و کەلتوور و داهاتووی نەتەوەیە.

ڕۆژی زمانی دایک بانگەوازی بیداربوونەوەیە؛ بانگەوازی ئەوەیە کە هەموومان بەشداری بکەین لە پاراستن و گەشەپێدانی زمانی کوردی. هه‌ر نەتەوەیەک کە زمانی دایکی بەهێز بێت، داهاتوویشی بەهێز دەبێت.

پیرۆزبێت ڕۆژی زمانی دایک؛ پیرۆزبێت زمانی کوردی، هێمای بوون و شوناسی نەتەوەمان.